巴黎直擊！Beyond: Two Souls　荷里活A級片「上身」

全身擷取Ellen Page

小記由《Juno少女孕記》電影開始已留意Ellen Page，開頭仲以為遊戲只係掛名用上明星噱頭，點知Quantic Dream嘅製作人Guillaume（Executive Producer）話佢哋真係請Ellen Page到Studio，以Motion Capture形式拍攝，每天由朝早8點半拍到傍晚6點，一連拍咗4個星期，片酬幾多真係恕小記唔識計囉！開發商用上全身擷取技術，一次過捕捉面部表情以至全身動作，難怪遊戲入面嘅表情同真人一模一樣。

Ellen Page扮演嘅女主角Jodie，在遊戲中會由8歲演到23歲，所以造型有40多個，連同其他角色差不多有成300個造型，總計有23,000個不同的動作表現，認真誇張！但Ellen Page點扮8歲小女孩呢？原來佢哋特別請來小演員做Motion Capture，再參考埋Ellen Page小時候嘅演出做後期製作，格局似足荷里活的A級大片！

遊戲講解喺Motion Capture Studio內進行，全球傳媒分兩天參與。

CEO David Cage稱，Ellen Page是選角時的第一人選：「Ellen既聰明又有一種脆弱感。」

插敍講述15年經歷

《Beyond: Two Souls》講一出世便跟靈體Aiden連繫在一起嘅少女Jodie的「靈異」經歷，而由Willem Dafoe扮演嘅科學家Nathan，既負責研究Jodie嘅「超能力」又同時做監護人。雖然遊戲製作人點都唔肯講Nathan係忠或奸，但點睇Nathan都有九分似「鄭子誠」，段估佢背後總有啲陰謀。遊戲時序橫跨15年，不過用上插敍手法，有時見到十幾歲嘅Jodie，有時又會時光倒流去番8歲時候，製作人話希望遊戲唔會一條直線咁發展，要玩家好似砌圖咁重構整個故事。

Executive Producer Guillaume對遊戲有好大期望：「《Heavy Rain》全球銷量250萬隻，《Beyond: Two Souls》應有350萬吧！」	放大圖片	Willem Dafoe（左）同Ellen Page（右）親身到場以Motion Capture拍攝，似足荷里活大片製作。

直覺操控鬼附身

女主角Jodie同靈體Aiden嘅關係都幾矛盾，一方面Aiden會失控行事，唔聽Jodie指揮；另一方面又可以用佢嘅超能力度過難關。小記試玩時，可按「三角」掣切換控制Jodie或者Aiden，由於後者係靈體，具有穿牆過壁兼隔空取物能力，更以直覺操作方法操控Aiden嘅能力，按實「L1」鍵加上左右Analog Stick便能令Aiden做出各種行動，甚至可以好似「鬼上身」咁操控其他角色，不過要睇其他角色嘅定力夠唔夠，遊戲入面便以不同顏色的光芒去表現，而且「靈魂出竅」嘅距離係有限制的。

分鏡甚有電影感，Jodie流落街頭拎起結他唱歌令人感動。	角色設計逼真，連淚盈於睫都充分表現出來。	Jodie在遊戲有不少飛車場面，危急時Aiden更會挺身而出作保護。

實試刺激又驚慄

Quantic Dream展示咗一段近40分鐘嘅試玩片段，講Jodie流落街頭，由暈倒時以Aiden嘅超能力牽引流浪漢相救，到遭縱火的舊樓中救出多個流浪者同伴，情節刺激又吸引。而且可直接從Jodie嘅表情睇得出佢嘅心情，連佢面部滲汗、熱淚盈眶都能仔細表現，畫質出眾。至於傳媒試玩環節，係Jodie進入研究院查明真相嘅場景，一入去時要用超能力將卡在電梯嘅箱子移走，過程中亦要靠讀心術，從屍體中讀取死前記憶，更發現佢哋係受靈體襲擊。雖然現場試玩版只有10分鐘左右，但已體驗到遊戲嘅驚慄氣氛，對於10月推出嘅正式版萬分期待！

DETAILS

類型：冒險

開發：Quantic Dream

平台：PS3

推出日期：2013年10月8日

售價：待定

特派記者：布偉倫

鳴謝：Sony Computer Entertainment Hong Kong