猛龍再起孖Look上陣

講到荷里活最傳奇嘅動作明星，史泰龍就算唔係冠軍，都必入三甲。佢老哥後生時憑《洛奇》和《第一滴血》打響名堂，估唔到過咗花甲之年仲有一套《The Expendables》（轟天猛將）為佢省靚招牌。愛向巨星致敬的Hot Toys，近日以續集造型炮製出1:6 Barney Ross，服裝、配飾、武器都跟到足，加上兩款造型Man到痹，粉絲豈能錯過！

售　價︰$1,280<br>預訂價︰$1,230（今年第3季推出）<br>＊圖為試辦款式，與正式推出的版本或有若干分別。

售　價︰$1,280
預訂價︰$1,230（今年第3季推出）
＊圖為試辦款式，與正式推出的版本或有若干分別。

服裝保持高水準

《The Expendables 2》中龍哥繼續飾演僱傭兵Ross，故事例牌邪不能勝正，但Who Cares?最緊要係子彈橫飛殺得過癮！今集佢主要有特種部隊及便服兩個Look，廠方為此做齊兩款服飾，前者剪裁細節Keep住高水準，軍靴做足舊化，防彈衣設計成「過頭笠」，比例恰到好處！至於便服一環，則有齊賊仔帽、洗水牛仔背心及中袖衞衣，後者更跟足戲服在領口加入3層Layers，還額外附送一對皮鞋，簡簡單單可變出兩個造型。

頭雕有改善空間

頭雕方面，Hot Toys由Rambo做到Rocky，再加上舊版製作史泰龍經驗，五官輪廓理應妙到毫巔；然而今次頭雕師Kojun似乎過於着重龍哥老態一面，落刀時重手得滯，不但面相略帶浮腫，雙眼更太圓太精靈，少了舊版的殺氣及神髓；幸好鬍子的改變廠方有留意到，加上連老人斑也塗裝出來，為整體加番不少分數。惟始終神似度不足，期望交貨時能作出改善。

頭雕繼續由Kojun操刀加JC. Hong上色，但新版（左）老態過龍，少了舊版（右）的殺氣。

頭雕繼續由Kojun操刀加JC. Hong上色，但新版（左）老態過龍，少了舊版（右）的殺氣。

照足戲服設計，腰後掛有左輪槍套，方便龍哥拔槍！

武器配件大堆頭

至於素體，今集沿用上代紋身Body，不但提供30個活動關節，爆衫Show肌後更能呈現彩繪紋身，Man到爆！另外，戲中Ross殺人如麻，背後全靠大量武器幫手，所以隨Figure會附送兩把短槍、一把左輪及一把M4突擊步槍畀大家，再加埋9隻可換手，想擺乜嘢射擊動作都輕而易舉。其他配件還包括黑超、防風鏡、耳機、手錶及雪茄等，喜歡大堆頭Parts嘅玩家今次冇投訴啦！