人形實驗 1:6 Tony Stark

為提升新鮮感又好，為配合《Iron Man 3》電影宣傳又好，廠方早前推出1:6 Tony Stark，不但罕有地以全相見人，心口仲加入新玩法，難怪預訂時要大排長龍！

心口植入LED燈

Iron Man飛走盔甲，自然要跟番個素體畀玩家。由於Body經重新設計，高30cm並提供30個關節，擺甫士夠晒靈活；廠方更將LED燈植入素體內，只要推一推背脊開關，心口位嘅反應堆便即時亮起，玩法破格。可惜初辦呢一Part仲未完成，暫時未知像真度有幾高。素體還有另一玩法，例如拆走左臂可換入機械手，小腿又能套入腳部夾件，變成半人半機械，切合電影中的實驗造型。

五官神似，若嫌個樣太老的話，戴埋副Headset會好啲。	Trailer中實驗室一幕一閃即逝，估唔到廠方連襯衫花紋都捕捉到。	腳甲是前後夾件，出廠時會跟埋魔術帶，方便束緊褲管套入其中。

巨型實驗地台

從《Iron Man 3》預告片得知，復仇者紐約大戰之後，Tony Stark變得身心俱疲，因此佢個樣殘到爆。針對此點，頭雕師Kojun及塗裝師J.C. Hong特別落重手，除了眼神、輪廓Keep住神似外，魚尾紋、火車軌亦深化了不少。而新作以實驗室作背景，附送頭盔、頸環及手掌等散件外，更提供設計草圖、螺絲批、電線及工作枱配件。另外，在Mech Test Version出過的機械臂，新作不但加入4個轆增加靈活性，前端位置更由滅火筒變成DV攝錄機！今次地台亦玩大咗，兩層設計加入發光企位，最大問題係Size咁巨型，Figure櫃點放得落？

有埋設計草圖，底下仲有本Tony Stark雜誌，但未經審批暫時冇得睇。	附送頭盔、頸環等散件，但全部着唔到上身，得個擺字。	螺絲批、電線跟番1:6比例，其他Figure都用得番。

售價︰$1,780

預訂價︰$1,730（今年第2季推出）

撰文、攝影︰陳志滔

查詢電話︰2388 4677