相比前幾集《Gears of War》由公布到發售要等近兩年時間，新一章《Gears of War: Judgment》真係快手好多，去年6月才發表，嚟緊3月快將上市。多人試玩版日前運抵本港供傳媒測試，當中Free for All模式玩10人互揪未算特別；反而OverRun模式控制獸族時就新奇刺激得多，尤其是爆炸蟲同百足蟲勁屈機！
《Gears of War: Judgment》大部分玩法建基於前幾集，故事背景源自「事變日」，獸人突襲30天後嘅激烈戰鬥。由兩位創作大師負責劇本，當中Tom Bissell拎過美國文學獎及古根漢學術獎，Rob Auten則負責過《阿凡達》同《異形》設計，來頭唔細；配合埋今集新增嘅智能再生系統、動態防禦機制，以及需要用特定方法或武器過關的解密任務（Declassified Missions），為原本已經刺激耐玩嘅遊戲，注入更多新元素。
新作最引人注目的OverRun多人模式，玩法以5打5為主，兩組玩家輪流扮演人類同獸族，前者負責守衞發動機，後者則進行破壞活動。獸族個個兇神惡煞，睇牌面都知人類冇運行，而且操控獸族嘅玩家儲夠分，仲可解封更強嘅獸類，小記試玩時連打幾個Round，人類如何頑抗都好易失守，既考反應又講合作性。當中人類備有工程師、偵察兵、戰士同醫療兵4個職業，最有實際用途係識得維修圍欄同興建炮塔嘅工程師，呢個亦係動態防禦機制一環，對拖延敵人十分有用，皆因獸族要破壞咗圍欄才可進入核心地帶。
起初獸族其實同人類嘅火力接近，但打咗幾分鐘儲夠分後，獸族玩家可以解封新獸類，這時形勢便會一面倒。例如細細隻嘅爆炸蟲，雖然畀人射幾槍就瓜柴，但勝在移動速度快，人類睇得見都瞄唔切，之後佢更可衝入人堆玩自爆，都幾屈機。另一屈機嘅係百足蟲，軀體巨型兼識噴毒液，攻擊力超強，冇3、4個人圍攻佢都好難搞掂。基本上獸族食硬人類，OverRun要鬥嘅係邊隊控制獸族時，可以最短時間打爆發動機，分秒必爭令人血脈沸騰！而且透過智能再生系統，每場對戰嘅敵人和場地都有所變化，每次玩都係一項新挑戰。
類型：第三身射擊
開發：Epic Games、People Can Fly
平台：Xbox 360
推出日期：3月19日
售價：待定
查詢電話：3071 4868
撰文：布偉倫