平玩Lumia 620大開色戒

自iPhone興起後，Smartphone外形變得毫無創意，長方形機身配以非黑即白色調，一字記之曰「悶」！勢估唔到，手機界最近竟然有番啲新鮮感，說的是Nokia最新入門機Lumia 620，首度採用Dual-shot雙色機殼設計，令機身可形成霧面或光面效果；加上多色任揀，大開色戒！

方塊介面設有3種尺寸調校，並能實時更新狀態。售價︰$2,298

雙層膠料　大玩混色

跟其他手機一味鬥大芒不同，屏幕僅3.8吋、外形的骰嘅Lumia 620，拎上手已予人驚喜，厚度及重量分別只有11mm及127g，嫌大芒機累贅嘅女士，如今單手便能輕鬆操控。手機另一特色是外殼採用Dual-shot設計，其做法是用一層透明或磨沙膠料，套在另一層實色膠料上，以達到光面或霧面混色效果。以小記手上的透明綠加實色黃機殼為例，極為搶眼，還備有紅、黃、藍、綠、黑、白6色選擇，用家更可額外購買橙色殼，啱晒好色男女要求。

黑位突出　爆趣影相

比起外殼的繽紛，屏幕就有點被比下去，雖然顏色總數達1,677萬色，但解像度只有800×480。幸好的是，屏幕支援ClearBlack技術，能有效改善畫面的亮度及對比度，黑位更出，睇相、睇片自然別具層次。提到睇相，拍攝規格又如何呢？500萬像素鏡頭唔算出色，但支援F2.4大光圈、28mm廣角及720p短片拍攝，用戶更可透過Cinemagraph功能製作動態相片，效果有趣！

跟機附送1款殼，提供黑、綠、白、紅、黃、藍6色選擇，橙色殼則需另購。

機面只比八達通大些少，啱晒女士使用。

500萬像素鏡頭旁設有LED補光燈。

方塊介面　兒童專區

去年Lumia 920的成功，為Nokia開發Windows Phone手機打下強心針，因此Lumia 620沿用Windows Phone 8系統，而不是常常出現於入門機的Symbian平台。方塊介面可放大縮細，並提供繁體中文顯示及倉頡輸入法，另設有「兒童專區」，讓家長們為子女制訂專用介面，就算畀部機佢哋玩，都唔怕被錯手刪除重要資料。雖然處理器僅是1GHz雙核心級數，但除了開啟相簿時較慢外，其他操作如撥頁及上網都極為流暢，玩遊戲都頂得住！