5.3吋Vega R3 4G睇韓星

韓流在香港吹了好幾年，完全沒有減弱迹象，不但肥大叔Psy急速彈起，Big Bang及少女時代等型男索女更搶走晒一眾粉絲，恨死一班本土明星。貴為忠實韓迷，學韓文同偶像溝通仲未夠，最好有埋呢部Pantech Vega R3手機，透過《U+ HDTV》程式睇晒韓國劇集同音樂節目，做個徹底的「哈韓族」！

Pantech Vega R3 售價：$4,580

串流韓劇

提起Pantech，大家可能較為陌生，但其實它在韓國本土僅排名在Samsung及LG之後，實力不容忽視。Vega R3最大賣點是跟韓國網絡商U+合作，預載《U+ HDTV》程式讓用戶睇晒韓國KBS等電視台的劇集、音樂及體育節目。小記連接Wi-Fi網絡下，所有節目都能以720p質素播放，而且連廣告汁都可撈埋；測試當日就見到當地狂播Psy廣告。惟留意程式設有時間限制，很多時看到中途便會自動暫停，但既然係免費就不要投訴了！

色彩自然

外形方面，它跟其他韓Phone一樣走簡約路線，提供純黑、純白兩色選擇，還採用圓角及收邊設計，加上最薄處只有9.95mm，女仔們拎上手都算舒適。另一搶眼點是機面的5.3吋巨芒及200萬像素前置鏡頭，自拍、照鏡都靚過人；而且面板採用Natural IPS Pro材質，清晰度、層次感都比一般LCD高得多，最重要是顏色自然，完全唔似Super AMOLED芒般帶有味精成分，用來睇相或播片夠晒原汁原味。

圖中可見，Vega R3（左）的屏幕比iPhone 5（右）大得多。

1,300萬像素鏡頭配備LED補光燈，規格中上。

極速4G

新機於韓國當地以Note II為假想敵，因此屏幕以外，硬件亦有番咁上下，內建Qualcomm最新1.5GHz四核心處理器及2GB記憶體，轉頁、影相同上網都極流暢！針對不黯Android的用家，它還提供Simple Mode模式，一經轉換，所有常用功能如日期、天氣、撥號及瀏覽器都會置於同一頁，讓用戶輕易找到所需功能。特別一提，此機支援LTE 1800頻譜，用到本港的4G服務，水貨機中實屬罕見！