西貢天文公園近20倍賞月光

過兩日就到農曆八月十五中秋節，年年都係玩燈籠、食月餅冇咩新意。如果今年想搞搞新意思，但仲未諗到去邊度賞月，不如一家大細到西貢創興水上活動中心旁邊的天文公園，入面有齊觀星賞月用嘅望遠鏡，仲有地方畀各位攤喺度曬月光，寓教育於娛樂。最重要係公園遠離市區光污染，月光自然又大又明亮。

20×80雙筒望遠鏡能夠放到20倍咁大，睇月光一流。

斜背觀星椅躺下曬月光

天文公園於2010年開幕，入面有乜嘢玩？今次一於請可觀自然教育中心暨天文館（HKNEAC）的天文統籌Kenneith，講解公園內的必玩設施。他表示：「天文公園主要分為3區，分別係肉眼觀測區、望遠鏡觀測區，同埋天文研習區。前者備有3排斜背觀星椅，每排椅都極為寬敞，可讓一家大細齊齊躺下，好Relax咁賞月傾偈。但由於農曆八月十五的月亮會好光，所以未必如平日睇到咁多星星。」觀星椅有兩種設計，一種係類似羅馬鬥獸場的環形設計，較為好氣氛；而另一種則向外彎曲，可以坐得舒適啲。

雙筒望遠鏡放大月球表面

難得月亮又大又圓，當然想睇得仔細一點，Kenneith話有計：「天文公園的望遠鏡觀測區，擺了4支雙筒望遠鏡，佢哋有20倍放大同80mm口徑，所以俗稱20×80雙筒望遠鏡；遊人毋須帶任何裝備，都可清楚睇到個月亮，去到入面必試！如果自備了望遠鏡或者相機，入面都有10支望遠鏡柱墩及2支追星儀，大可充當腳架使用。」值得留意，為免遊人利用雙筒望遠鏡觀看太陽而弄傷眼睛，雙筒望遠鏡只會於晚上7時30分至翌晨5時30分運作，其他時間無法使用。

觀星專用座椅空間寬敞，一家大細齊齊賞月都唔覺逼。

望遠鏡觀測區豎立了4支雙筒望遠鏡、10支望遠鏡柱墩及2支追星儀。

天文研習區設有一個小型天象廳及多種明代測量天象工具的複製品。

小型天象廳賞月兼觀星

至於天文研習區的設施，並唔係觀測工具，內裏擺放明代天文儀器的複製品，以及現代化的小型天象廳。Kenneith笑言：「頭先提過，農曆八月十五的月亮由於光線太強，觀星會有難度。而小型天象廳內便有星空投影，讓各位睇到月光之餘，同時睇埋星星。如果各位專程想睇星的話，應該揀新月（農曆初一）或殘月（農曆廿五前後）的日子。」他補充：「雖然每件天文儀器都有說明用途和使用方法，但普通人單睇文字好難知道點樣用，有些工具如渾儀就最好有導賞員講解，很多人都唔知四條龍圍繞中間的是六合儀呢！」

如日間去到天文公園的話，只要雙腳站在「人體日晷」月份，利用太陽照射影子，便可知道當時大概幾點鐘。	小型天象廳內有投影機，按下中間的開關，即可投射星空影像到天幕。	渾儀的外形別樹一格，由四條龍圍繞中間的六合儀，唔少人會拍攝留念。
每項明代天文儀器的複製品會有指示牌，內裏圖文並茂提供說明。