Lumia 900面書傳相即影即Tag

早前facebook於美國上市引來全球關注，雖然股價插水，但仍無損一眾「面書」用家興致，截至今年3月底，每月活躍用戶高達9億人！如果你都係「面書」用家的話，Nokia新出的旗艦機Lumia 900一定啱你，皆因廠方特別將「面書」分享功能融入手機之中，影相時撳完快門掣即可Tag相兼上傳Timeline，連App都唔使開，鬥更新速度邊個夠你快！

機背備有800萬像素鏡頭，配合LED閃光燈，室內影相都掂。

靚相網頁即時分享

據非正式統計，十個智能手機用家，九個都會裝《facebook》App，目的係將近況隨時話畀朋友知。Lumia 900便將呢個「分享」功能發揚光大，影完相之後，撳吓個「分享」掣便可即時留言及Tag相，更可直接更換Profile相片，全程唔使開App，超方便！除咗Tag相之外，連內置瀏覽器《Internet Explorer 9 Mobile》都加入分享功能，睇到任何搞鬼嘅網頁，撳個掣便可Share畀朋友，點可以唔Like？

獨家軟件導航至醒

話明係Nokia旗艦手機，單單分享功能當然未夠。新機預載Windows Phone 7.5系統，繁體介面、中文手寫輸入、自動顯示更新的動態磚等功能全部有齊。最抵讚是廠方為Lumia系列手機「加料」，推出地圖、導航、公共運輸Apps，其中《Nokia導航》支援離線語音及點對點汽車導航，用家可預先下載多達110個國家的免費地圖；而《Nokia公共運輸》只需輸入起點、目的地，便可搵出交通方法，支援多達500個城市。

用家可半按快門鍵作對焦，同時支援篤芒拍攝。

採用Windows Phone 7.5系統，動態磚介面簡單易用。

採用microSIM卡，換卡時需要用上SIM卡匙。

屏幕加碼更靚更黑

驟眼睇新機，平面方角一體式設計，加上聚碳酸酯外殼，確實與上代Lumia 800有九成相似。但新機勝在屏幕由3.7吋加碼至4.3吋；而且沿用靚爆嘅AMOLED屏幕，加上支援ClearBlack顯示，煲劇、睇片時黑位更實淨，顏色對比較明顯，效果自然順眼得多！而Lumia 800的強項如800萬像素F2.2大光圈蔡司鏡頭等，新機都一一保留，更加入100萬像素前置鏡頭，可以用作視像通話。值得一提是，港版Lumia 900並不支援LTE制式，幸好仍可以42Mbps HSDPA+極速上網，配合加大的1,830mAh電池，夠晒長氣。