Google+直播開騷 Robynn & Kendy網上唱好
有冇諗過演唱會都可以做網上直播呢？剛過去的周日，社交網絡Google+便透過「Hangouts直播」服務，將女子組合Robynn ＆ Kendy（簡稱R&K）於九展舉行嘅音樂會全程網上直播，唔使身處現場都可即時聽到Live Concert！原來佢哋唔止活躍於Google+，每段YouTube短片的拍攝、剪片、錄音、上載都由二人包辦，效果仲媲美專業級數，堪稱新一代IT Girls！
Hangouts直播
Google+推出了一段時間，除了「社交圈」、「+1」等基本功能，其實仲有唔少特別玩法，好似《Hangouts視訊聚會》便可以與最多9位朋友進行視像通話。最近更加新增《Hangouts直播》功能，它其實係將你同朋友嘅視像通話公開串流，全世界任何人都可以喺網上隨時參與，而今次Robynn ＆ Kendy舉行的音樂會，就係以這技術進行網上直播。Kendy表示：「希望透過《Hangouts直播》服務，令香港以至外國的朋友，都有機會聽到我哋嘅音樂！」
網上互動
作為樂迷，小記亦於演唱會當天，安坐家中睇R&K網上直播，雖然480p畫質未算清晰，但勝在無論畫面或音樂，都串流得非常順暢，未有出現Delay情況，猶如置身現場之中。加上《Hangouts直播》會同步顯示網上觀看者，有人甚至會與現場Fans同步拍手、揮手，感覺好High！而R&K亦即場向網上觀眾問好，網友仲即時作出回應，互動又過癮！睇完Show嘅網友紛紛喺R&K的Google+專頁留言支持，證明活動都幾成功。
後期製作 一手包辦
《壞習慣》、《想你》等一首首廣東話改編歌的YouTube MV，畫面Moody、音樂清晰，製作質素勁專業，原來幕後全由Robynn和Kendy包辦。Robynn表示：「其實我哋只係用單反機EOS 60D進行拍攝，720p的影片質素擺上YouTube已經好清晰；最重要是記得預先調校好光圈，亦要因應燈光而轉換角度。」Kendy補充：「為求MV的效果更好，我們更會分開聲音錄製。」
軟件初哥 邊用邊學
亦因為要全程一手包辦，所以後期製作變得更重要，她們笑言全靠手中的電腦：「我們都是用MacBook Pro，而電腦預載了《iMovie》、《GarageBand》兩個軟件，前者可以用來剪輯影片及加入過場效果；後者則可加入一些混音和調校聲效。」聽落相當專業，但她們坦言是邊用邊學，幸好兩個軟件都User Friendly，反而之前用過的音樂軟件《Logic Pro》功能雖然齊全，但卻較難上手。好多人以為男士較擅長玩電腦，不過她們強調：「其實與男仔女仔無關，只要有心學一定OK。」
YouTube平台分享
R&K上載的MV大部分都有逾10萬觀看次數，其中《思念是一種病》更接近100萬次。問到她們的成功之道，Robynn和Kendy都謙稱是啟發自外國歌手：「外國有唔少人將自拍MV擺上YouTube分享，不過絕大部分是國語或英文歌，反而廣東話歌就冇乜。其實我哋冇特別Promotion，可能畀心機做真係有人睇到，不過意料之外係有咁多網友欣賞！」
撰文：林子聰 部分攝影：張錦昌