VT50/ST50 3D Plasma 賽事衝線格格清

2,500Hz Focused Field Drive技術

Panasonic係奧運會電視產品嘅合作夥伴，要明白睇運動比賽，需要高速畫面既穩定又細緻，在0.01秒衝線一刻才見鬼影，便認真趕客！今次兩款3D Plasma電視VT50同ST50，均加入2,500Hz Focused Field Drive技術，睇數字已比上年600Hz Subfield技術架勢，它可令每一格畫面都做得清晰光亮；加上Plasma面板本身顯示色彩和暗位方面有好大優勢，睇波或運動項目都變成享受。新機仲用上質素更靚的G15 NeoPlasma屏幕，另支援Infinite Black技術，營造出極高對比度；而VT50跟ST50的原生對比度分別達到6,000,000:1及5,500,000:1，配合24,576層灰階顯示，層次感同真嘅一樣！

捽捽遙控睇網頁

VT50同ST50外形幾乎一樣，機身厚度大概50mm左右，但論級數，以VT50高級一啲，提供3D THX認證同ISFccc專業調色設定，不過小記睇落畫質分別唔大。兩機均配備Smart VIERA功能，可將電視以有線或無線方式連接上網，直上facebook、睇YouTube片、下載Apps，以及用新出嘅Web Browser睇網頁；配埋新一代內建Touch Pad的遙控器，大可充當電腦使用。擁有iOS或Android智能手機嘅用家，仲可下載《VIERA remote》程式，經手機遙控電視，亦可將手機內的影片、相片隔空傳送至電視睇，係主流電視廠嘅做法。

2012年轉咗新款主動式快門3D眼鏡，充電約2分鐘就可睇足3小時。	VT50/ST50用上方形金屬底座，甚具時尚感。	安裝《VIERA remote》App後，可用手機遙控電視。

試片區

播放高速運動畫面都表現得流暢細膩，2,500Hz Focused Field Drive技術應記一功。

除咗原來的Remote，還追加附設Touch Pad的遙控器。	將電視連線後，可經VIERA Market下載各款新Apps。	新增Web Browser，用大電視瀏覽網頁好似用電腦咁方便。

同場加映：WT50配IPS LED面板

同場還加推3D LED電視WT50，同樣搭載超高速顯示技術提升畫質，在原有經插入3格畫面而成240Hz顯示技術上，再加入8格背光掃描，成為1,920Hz高速背光掃描技術，令高速移動畫面做得更靚更實淨，睇運動比賽同樣有着數。為咗提升顯示質素，新機更換上IPS LED面板，可視角度達到178度。其他功能方面，備有VIERA Connect、2D轉3D功能，以至ISFccc專業級調色設定；另備有自動感光系統，可因應周圍環境的光暗而調節亮度慳電。值得一提是機身用上幼邊框及薄身設計，並加入新月形底座，電視亦以玻璃圍邊營造懸浮感覺，設計極盡優雅！

售價：待定（55吋）、$25,990（47吋）	機身超薄，亦可見用上新月形底座。	售價：待定
藍光機都玩Touch Pad遙控器，向上捽就可播放影片。

DMP-BDT320 3D藍光機

出得3D電視冇理由唔出埋3D藍光機，Panasonic同場加推這部以Slot-in式設計的DMP-BDT320影碟機，其外形設計仲得到CES的Best of Innovations獎項！功能當然亦屬高水平，用上Adaptive Chroma Processing技術，將色水調校得更準更靚，配合內置數碼真空管提升音效通透感，內外兼備！

撰文：布偉倫

攝影：陳世昌

查詢電話：2833 0955