動作遊戲講求一個突出嘅主角，舊陣時有《Tomb Raider》嘅羅拉，近期上位有《Uncharted》嘅Nathan，只要角色討好，續集遊戲便長出長有。但點諗到《Prototype 2》可以咁狠心，第2集嘅新主角，竟然以「做低」上集主角為目標，發布時更用上「Murder your Maker」呢句口號！而新主角仲識得將身體變成武器，於紐約瘋狂殺戮，係今個月最爆嘅遊戲！
3年前推出嘅動作遊戲《Prototype》，講失去記憶嘅基因改造人Alex Mercer，在紐約以殺戮尋找回憶，同時揭破當中陰謀；從身體變形成各式各樣武器，到超華麗動作風格，均大受玩家歡迎。來到第2集，主角卻變成退役黑人士兵Sgt. James Heller，因為上集主角將Blacklight病毒散播至New York Zero地區，搞到James嘅妻女受到感染致死，所以他決定重返軍方拯救病人，但點知成隊戰友都感染疫病，得番自己單打獨鬥，情況幾咁悲壯。
新主角本身係人類，點夠基因改造人揪？所以劇情安排Alex看中了James的免疫能力，將佢變成改造人諗住可以幫手，點知佢唔領情兼搞破壞！而改造人的變形能力都幾誇張，譬如可將前臂變成盾牌、利爪、巨型刀刃、錐形拳頭、荊棘長鞭等，長短攻擊距離以至防禦武器都有，真係諗得出、變得到，可說是《Prototype》系列最引人入勝之處，而且打到甩手甩腳、血花四濺都係家常便飯！
遊戲在New York Zero地區進行，不過同大家想像嘅紐約風景有好大落差，地圖只有戒備森嚴嘅軍事綠區、難民營嘅黃區、受病毒感染嘅紅區，分主線及支線進行。透過完成唔同任務，新主角仲可以升級、解鎖技能同創造獨特嘅能力。不過要在地圖搵任務同目標人物都唔易，因此玩家要進入遊戲內的電腦網絡Blacknet，睇晒全城嘅軍事資料。最後新舊兩代主角相遇，會掀起甚麼恩怨情仇，就留待大家慢慢發掘啦！
類 型：動作
開 發：Radical Entertainment
平 台：PS3、Xbox 360
售 價：$399
查詢電話：2418 8896
撰文：布偉倫