聲控ES8000系列聽廣聽話！

3D電視已面世近3年，畫質上可以再進步的空間不多，但係改善操控仍存在好大可能性。有冇諗過可以靠把聲控制電視開關、調校音量和選台？Samsung 2012年旗艦級3D Smart TV ES8000系列，除了畫質及外形均達頂級水平，仲首次加入聲控同體感操控功能，對住電視親暱地講句「Hi TV! 開機」便可開着，好玩到不得了，將3D電視推至另一層次！

售價：$36,980（55吋型號、附送4副3D眼鏡）

廣東話開機選台

新機又玩聲控又玩體感，真係有啲似Xbox 360 Kinect，但醒目在將鏡頭和收音咪隱藏在極幼的5mm邊框內，唔貼近機身都察覺唔到。至於聲控功能有幾好用？小記試玩時，講聲「Hi TV！開機」，電視便即刻開着，講「大聲」就調高音量，講「下一台」則幫你跳至下一台，只要事先在設定頁揀番「粵語」，便能同部電視以廣東話溝通，長者、小朋友或者有按鍵恐懼症的人士，都可以好輕鬆咁操控電視。嫌對住電視大叫有失斯文的話，拎住內置收音咪的智能遙控器輕聲細語都得，認真貼心。

Smart Content全家啱玩

相比聲控，體感操控便稍為費力，當用手掌在電視前掃一掃，畫面便會顯示滑鼠游標，跟住可移動手掌揀各個選項，再合埋手掌便可進行確定。除了聲控和體感操控的Smart Interaction外，另一樣Smart Content的內容亦相當吸引，可於Smart Hub加入本地Apps外，仲備有專為小朋友而設的Kids功能、可連上無線電子磅的Fitness功能，以及可開群組聊天室嘅Family Story功能，照顧不同人士需要。新機還支援Smart Evolution智慧進化，可外接模組提升電視效能和擴充功能，但實際升級後有幾勁，睇怕要2013年先知！

機頂位置「隱藏」鏡頭，用來感應體感動作。

怕聲控電視嘈親屋企人，可對住智能遙控器細細聲講。

機身厚度僅30.8mm，超薄！

800Hz CMR極致畫質

作為旗艦級3D Smart TV的ES8000系列，當然有齊各種頂級技術，如採用雙核心處理器提升運算效能，支援800Hz CMR流暢倍增技術加強高速畫面的流暢度，而且配合Micro Dimming Ultimate極致光暗調校技術，可進一步強化對比度、色彩感同細緻度，畫面又Sharp又靚，相當吸引。