2012年的旅遊焦點，英國倫敦應該攞晒彩，除咗7月奧運夠晒矚目，而另一話題作則會於明日登場：以全球大熱的電影《哈利波特》作招徠的Warner Bros. Studio Tour London，遊客將會墮入最「真實」的哈利波特世界，事關《哈》片拍攝用的場景及道具會近乎晒冷擺喺你面前。
新鮮熱辣的哈仔主場位於利維斯登（Leavesden），原本是電影拍攝的片場，電影公司在電影完結後，動用了1億英鎊，將之改變成這個可供參觀的片場。畢竟《哈》電影太深入民心，而且前後睇咗8集，不少場景已經入晒腦，所以到此一遊最大魅力是可以置身真實比例的場景，感受自己是《哈》的一分子，感覺超High。片場佔地15萬平方英尺，分為多個場區，遊客先看過3位主角講拍攝感受的短片後，便以單程路方式前進參觀，可以欣賞到室內景（如魔法學校大廳、多個房間場景等）、室外景（如三層高的巴士、德思禮家等），然後睇特技道具、最後是第一集已登場的斜角巷（Diagon Alley）街景，身在其中，輕易勾起你對《哈》片的種種回憶。
而行程的壓軸位是直徑逾50英尺、以86名設計師及工作人員炮製的魔法學校霍格華茲模型，原來電影中出現的學校就係用呢座模型來拍攝，無論是外貌抑或內籠的走廊位，都流露出超仔細的做工，在屏幕看時以為是真正的建築物呢。如果以為這裏會有樂園成分，期望機動遊戲助陣的話，肯定會大失所望，事關場區以「睇」為主，最有娛樂性的，不過是換上哈利仔服裝、坐在魔法掃把影張合成飛天相留念。不過身為《哈》迷，睇場景、再到專賣店買支魔杖過過癮，應該都夠晒滿足。
Warner Bros. Studio Tour London
地址：Studio Tour Drive, Leavesden, WD25 7LR
交通： 由London Euston火車站往Walford Junction火車站下車，轉乘接駁巴士即可
收費：每位￡28（約HK$347），須於網上預訂，不設即場售票
時間：首場10:00am、尾場4:00pm（周末及假期延至6:00pm）
查詢：（44）8450 840 900
網址：www.wbstudiotour.co.uk
撰文：張超駿