XPS 13 Ultrabook 輕身豪玩

「你呃人！唔好講大話！」Dell新推出以Core i5搭載128GB SSD的XPS 13 Ultrabook，竟然以$10,999高價開售，唔通因為係Dell主場所以賣得貴啲？其實只要拎上手就明白晒，新機造工靚、質感好，Detail位和設計落足心思，1.36kg機身更明顯地較同級13.3吋機款輕，拎出街仲用到8.5小時，襟玩襟砌！

售價：$10,999

最薄部分僅6mm

其實好多電腦廠都已經出咗Ultrabook，而身為美國大廠嘅Dell，要到近日才在港推出XPS 13 Ultrabook，當然要出奇制勝。坊間的13.3吋Ultrabook分為SSD和HDD兩大硬碟陣營，重量大約在1.4~1.5kg之間，而新機只重1.36kg。此外，除咗機身最薄部分僅6mm夠吸引，比起同級機款，最大分別係機身長度明顯較短，好大程度因為今次Dell為顯示屏引入幼邊框設計嘅緣故，令纖薄機身都能擁有13.3吋大芒；而顯示屏更屬1,366×768解像度LED背光型號，顯示效果算得上幾靚幾Sharp。

細位設計見心思

硬件方面，新機配備Core i5-2467M 1.6GHz處理器、4GB記憶體、Intel HD Graphics 3000圖像顯示加上128GB SSD硬碟。其實礙於Ultrabook體積所限，要鬥硬件並唔容易，為此廠方特別為機殼加上耐磨嘅鋁質機面，配合碳纖維底座，令機身輕得來更堅固，散熱更佳；甚至連機底都一樣有Design，除咗可見到陰陽格圖案外，中央仲有塊型仔嘅XPS刻字鐵牌，但爭在香港唔似得外國有刻名服務。

機身備有特大Touchpad，支援多點觸控。

連接介面未算豐富，這亦是Ultrabook的先天限制。

8秒開機特異功能

此外，機身的「特異功能」都有唔少，譬如Intel Smart Connect功能，喺休眠狀態之下，可以自動更新網頁或收發電郵。而且開機時間最快只需要8秒，休眠狀態下起動更只需1秒，令大家幾時都可以迅速地投入工作。對於手提電腦來講，電量表現都好重要，新機用上6-Cell電池，最長可用到8.5小時，算得上做到「All Day Use」。至於跟機軟件就同Dell其他機種冇大分別，預載Stage UI等工具；不過連接介面就有點奇怪，不設HDMI、VGA Out而用上Mini Display Port，這個還算，但不設讀卡器就未免唔夠方便啦！若想再高級啲，則可配埋Core i7處理器跟256GB SSD，入手價由$13,999起。