一邊看選舉論壇，一邊在寫專欄，豬狼互爆誰曾出賣港人利益，真係好Desperate……但撫心自問，我天天爬格子，一旦靈感枯竭，也會好Desperate去「出賣朋友」……以下是朋友Z的真人真事，都幾好笑o架。
Z是時尚女性，美麗大方動人又具學識，憑個人努力做出一點成績，但亦喜歡掌相命理風水玄學。今年初她去看流年，向來百發百中的相士竟然說：「到農曆六至七月，你命中嘅XX星跟YY星會相遇，若果在古代，即係要做『雞』。」
吓？做雞？Z一時語塞，然後幽默地問：「生意好唔好先？」
是啊，做人要向前看，假如命中注定，也要找到自己的Niche，一樓一或是跑私鐘？是款待富豪還是服務地盤佬？要扮淫賤住家菜抑或裝作暴力S&M？總得有個檔次和路線。不過，正如相士說「若果在古代」，來到 21世紀將以甚麼方法顯現出來呢？Z很想知道。
有人說：「係唔係會桃花旺？」Z答：「桃花旺就會話我桃花旺啦，使乜要講我做雞啫？」另一人說：「咁你會唔會做咗人哋『小三』？」也有人說：「可能有個有錢佬想包養你呢？」 Z澄清：「無理由啦！我結咗婚，仲啱啱有咗，邊鬼個會想要大肚婆喎？」
有人提議：「不如你到時大住個肚去拍寫真，仲專登擺啲超淫賤嘅姿勢，咪可以化解囉。」我說：「咁嘅話，相士之言就應驗咗，你真係好雞。」
旅遊飲食寫作人