陳強　有人喜歡黑

早市場一步

陳強、林日曦及阿Bu 3位年輕人，於09年推出一張黑白雙面印刷的紙張《黑紙》闖江湖，當時睇好的人應該不多，跟時下彩色印刷、十幾蚊幾百頁的雜誌相比，《黑紙》太單薄了。過了兩年，《黑紙》沒有倒下，反而發展至2011年每期印逾7萬份，年長一輩覺得他們三人創作的黑句一味食字搞Gag，「朝狗晚狗」、「白蘋果是最紅蘋果」、「空即是識，通識即是空」，但後生仔卻看得津津有味，甚至推出黑句結集本《黑紙辭典》。

問陳強成功因素，他強調跟一貫滿足市場需求的營商手法來得截然不同，「我早過讀者知道佢哋想要乜，我出咗，然後令佢哋愛上。」玩個性唔會因應讀者喜好，甚至跟讀者對着幹，最明顯是剛於3月重新上路的《黑紙》除了改為周刊及免費派發之外，更開宗明義叫做「偽廣告雜誌」，打開後其實基本內容本質不變，卻多了一句「賣廣告，不賣信念」，問陳強搞乜東東，背後原來有段古：「上年《黑紙》暫別時，我們開追悼會徵集意見，有讀者話因為黑紙多了一頁廣告所以唔鍾意。但我唔覺得有錯喎，我搵人落廣告、同我出去打份工賺錢再搞雜誌有乜分別？所以索性改做『偽廣告雜誌』，歡迎人搵我哋落廣告。」《黑紙》就是予人撐到行、認為啱就做的印象，諗深一層這就是正宗後生仔本色，也可能因此才得到年輕一輩的共鳴。

《黑紙》做出版、拍廣告MV、搞活動，均離不開陳強形容的《黑紙》風格：「怪怪哋、有啲幽默、有啲玩嘢。」

重新上路的《黑紙》不再玩黑白兩色，反而將每期主題大大隻字用鮮色印在訪者靚樣上，都算破格。

三位一體

《黑紙》的另一個古怪之處是公司結構。問陳強與兩位拍檔之間如何分工？他淡淡然道：「有嘢3個一齊寫，有決定3個一齊下；就算搵林日曦或阿Bu做訪問，講的內容都跟我一樣。」他謂彼此無論股份、公司地位及工作量都一樣，但性格上卻有互相補足之處，「林日曦傾向硬淨同冷酷，所以適合出街見客及給予指令；我比較嬉皮笑臉，所以適合做調和角色；而阿Bu就最搞笑貪玩，落指令冇人會聽，但卻是最佳的潤滑劑，幫忙打圓場。」平等主義亦伸延至下屬，他們最近聘請的行政秘書，一大福利係「真病唔使病假紙」，亦毋須返工放工打卡等俗例，基於陳強強調員工係拍檔，相信「我對你真心，你對我真心」的一套，如此的不規矩，換來是「效率比任何大公司都好」，假日搞活動要員工幫手亦從無怨言。

新《黑紙》除了風格上的改變，公司最近轉換了新的工作環境：原來之前3位並沒有固定的辦公室，開會度橋要去茶餐廳或Cafe，「始終係人哋地方，你唔買杯嘢飲，可以坐幾耐？有Office就可以焗住大家去醞釀一啲創作」，終於在上年11月進駐專門以廉價向文化工作者出租單位的富德樓，結束了浪人的生涯。「創作需要一個竇去互鬥。」陳強隨口一句感想，都幾黑句。

在香港旅行

除了搞出版，《黑紙》更是一個跨媒體單位，拍廣告片、搞活動及拍MV外，新搞作是聯同9位Blogger一齊推出旅遊書，「每個Blogger介紹7個地方，夾埋我哋《黑紙》一共有70個地方。」強調唔係坊間的旅遊工具書，黑紙亦搞鬼地唔講外地，反而介紹3位主腦在香港經常蒲的7個地方，「想帶出你真係愛你做的一切，自然就自由，去到邊處都係旅遊。」自言自己的旅遊資歷不入流，去過的十幾次旅遊，都是日本、台灣及泰國等大熱地方，陳強卻有自家一套的旅遊哲學：「人哋成日話去旅遊唔好重複地方，覺得睇少咗嘢。但我認為真的鍾意，點解唔去多次呢？」他喜歡重臨舊地的感覺，甚至有一趟日本4天團，會重複去同一條街3次。「鍾意咪再行囉。」自稱唔會為旅程計劃，只會上到機才睇下本地圖，「去到外國，任何店舖都係新的，唔一定要跟人去Bape先開心呀。」不過，陳強即將衝出亞洲，6月會去北歐旅遊，「預十幾日去丹麥、挪威、瑞典及芬蘭等地，因為大家話當地係最適合人類居住的地方，我就想以最不適合人類居住之一的香港居民身份接觸一下，睇下有冇得着返嚟影響一下香港。」

《黑紙》搭上糖兄妹

《黑紙》改成偽廣告雜誌，由原本的月刊改為周刊，工作量一下子爆升，但他們的副業依然活躍中：採訪當日陳強正為《黑紙》負責的信貸公司廣告埋尾，呢排熱播中的糖兄妹薄荷糖廣告，拍攝度橋的亦是由《黑紙》負責；而稍後糖兄妹於5月舉行的演唱會，亦交由《黑紙》孭飛，「我哋做音樂創作總監，無論舞台設計或曲目流程都由我們負責，不過現階段還在度緊橋。」

陳強Profile

於2005年加入《森美移動》成為叱咤903的DJ，先後參與多個廣播節目，並曾主持《人人人》、《你睇我唔到》等節目，於2011年因「想出去闖闖」而離開電台。於2009年跟阿Bu及林日曦聯手推出《黑紙》至今，亦同時進行活動企劃、廣告及MV拍攝等工作。出版了《討厭我嗎？你喜歡吧！》及《你睇我唔到》兩本個人作品集。

撰文：張超駿

攝影：盧展程

鳴謝：American Eagle Outfitters（服裝）