世界其實唔係完全平等，明天3月8日是婦女節，但到底世上有冇「男士節」呢？姑勿論如何，小記今日亦擺明唔公平，所介紹的iPhone Apps都係專為女士而設，有教各位正確讀出名牌發音的App，也有影得大家又白又滑的影相App，更有可收睇世界各地Fashion Show的App。當然，男士想氹伴侶歡心，試用亦無任歡迎啦！
講到Shopping，女士們應該最高興，但時裝界充斥着好多難讀到喊的牌子和設計師名字，如果一時搞唔清，全部都以港式英語發音，實畀真正潮人笑餐懵，同將「WhatsApp」讀成「WhatApps」差唔多。但只要有《Speak Chic》就唔使怕，它收錄超過300個由世界知名牌子到刁鑽Labels，仲配有真人發聲教你讀，正如Hermès讀音似「愛瑪仕」而唔係「靴密士」；另亦加入不少品牌歷史，Fashion Lover必「單撈」！
售價：1.99美元（折約港幣$15.5）
就算只得100磅，女士們都會藉口話「肥在你見唔到的地方」而嚷着要減肥。《Calorie Counter by FatSecret》就最適合留意體重指數多過恒生指數的女士，只要輸入每天進食的餐單，即可計算出攝取的卡路里，再扣除日常運動所消耗的卡路里，便能推算每天可減多少磅，更能從圖表監察重量變化，仲要減幾多磅才能達到目標便一目了然！
售價：免費
收費電視其實都睇到Fashion TV，但要每次坐喺屋企先睇到世界各地的Fashion Show同專訪，確係唔方便。只要在iPhone裝上這個剛推出的《Fashion TV》，女士們便可在High Tea時拎出來收看。同電視有幾唔同？這App可以將頻道內的影片分享至facebook、twitter，而且有得睇埋網上版都冇收錄的獨家內容，既然係免費任裝，各位又點可以忍手呢？
售價：免費
化妝是一門高深的學問，不少女藝人都係靠高超化妝技術才變成女神，但將化妝品胡亂塗在臉上而希望獲得明艷照人的效果，既犯本又浪費時間。其實只要在iPhone裝上《MakeUp》，再上傳自己的相片，即可試驗各種顏色的唇彩、睫毛液、眼影、眼線等，有成2,000種獨特色彩可揀，試到啱先至真正在臉上化妝，確實方便好多！
售價：限時免費（原價0.99美元）
大多新款DC都加入美顏功能，影相時會幫大家「執一執」，可執到塊面尖少少又白少少，但只要利用《POCO美人相機》，iPhone都一樣做得到。這App可簡單達至美顏效果，由美肌、嫩膚到調色都可一步搞掂，就算臉部有雀斑、皺紋或痘痘都可輕易執走，效果幾有雜誌封面女郎的相片Retouching感覺。事實上有邊個女士唔想又白又滑先？
售價：免費
撰文：布偉倫