游走餐室嘗．回憶

Tour 1

當旺角美而廉快將停業的消息傳出後，引來大批客人湧至，一嘗馳名的大件夾抵食鐵板餐，懷它的舊。少年食神Michael細個時便經常到美而廉鋸扒，雖然味道不是最好，但有一份情意結，「細個在何文田讀書，爸爸經常帶我去旺角行百貨公司，好似已結業的中僑國貨、大華國貨，所以不時到美而廉鋸扒。這裏唔需要甚麼Table Manner，仲分分鐘平過自己買餸煮。近幾年再去，Old School的裝飾都冇變過。」

放大圖片	40多年歷史的中民冰室，恐怕今年亦會結業。

美而廉就近中旅社、球場、書店及波鞋街，客源複雜，但亦是其有趣的地方。王貽興對它亦有一份情：「當年大學畢業後要到新界教寫作班，在旺角轉車時，每星期總有兩、三天在美而廉開餐。佢哋啲食物分量大，而且就算一個人入座都唔會唔自在，餐廳內有刨馬經的中年漢、有金毛青年、有買完書的文藝青年，構成一幅有趣的眾生相，值得一遊。」

美而廉餐廳

開業年份：1963年

地　　址：旺角洗衣街86號地下

Tour 2

香港Secret Tour免費導賞團創辦人Stephen表示，冰室是茶餐廳的前身，初時只賣雪糕、冰飲及小食，後來要跟茶餐廳競爭才加入飯類，而中民冰室就令他印象深刻。「這裏的懷舊裝飾吸引之外，早前帶外國遊客來這裏一嘗招牌炒通心粉，佢哋話想像唔到通心粉可以炒，而且炒得咁好味！這些連香港人都未必知的老字號食肆，其實有好多滄海遺珠，好值得本地人細味。」但中民冰室身處的東頭村22座，按計劃將會於2012年內拆卸，或許只能成為各位的回憶。

中民冰室

開業年份：60年代

地　　址：九龍城東頭村22座9~11號舖

Tour 3

昏暗燈光、懷舊卡座，餐廳內氛圍停留在60年代，跟銅鑼灣鬧市周遭店舖成強烈對比，心水清的朋友應知道這是《花樣年華》跟《2046》的拍攝場景之一。

金雀餐廳

開業年份： 1962年

地　　址： 銅鑼灣蘭芳道13~15號地下

Tour 4

曝光率最高的老字號餐室，一定要數油麻地眾坊街跟廟街交界的美都餐室，不少電影、電視劇都在此取景。紙皮石牆壁、牆上餐牌及二樓卡座更是其他餐廳難比擬。

美都餐室

開業年份：1950年

地　　址：油麻地廟街63號地下

Secret Tour Stephen

「原本上個月敲定會搞白宮冰室Tour，而且跟老闆傾好，原定2月11日出發，點知2月4日Pre Tour時，去到見冰室關門並已經拆緊嘢。現時香港冰室只剩低廿幾間咋，見一間一間咁消失都幾唏噓。」

專家有Say

少年食神Michael

「我自己好鍾意懷舊的事物。除美而廉之外，對其他冰室的消失都感到可惜，例如當年識得唔少朋友，會去白宮冰室歎出爐麵包、飲杯奶茶。至於滄海遺珠還有上水廣成冰室的紅豆冰，或者到上環海安咖啡室食西多士。」

作家王貽興

「舊式餐室是體現香港庶民風情的好地方，食客跟夥計可以暢所欲言談論熱門話題。新派茶餐廳雖然裝修精緻，但風味始終不及紙皮石馬賽克牆壁，這些都是值得保留的集體回憶。華富村還有一間華富冰室，偶然都會坐低飲杯嘢、影吓相。」

經典美食

手刨冰（廣成冰室）

以碩果僅存的舊式刨冰機製刨冰，外表奇怪但食落滋味。

焗排骨飯（美都餐室）

排骨焗得酥軟入味，較連鎖店快餐店焗豬扒飯好吃得多！

3月懷舊美食團

每個舊區都有它值得回味的老字號食肆，Secret Tour於3月將會舉辦「沙田尋味時光團」，同80後、舊沙田街坊、外國遊客，一同品嘗區內的老字號食肆，其中一個「景點」是年前差點被拆，店內有很多藝術裝飾的瀝源盛記麵家，更會收集老店物件和寫低感想放入時間錦囊。有興趣報名的朋友記得上網留意Secret Tour公布。

網址： www.facebook.com/secrettourhk

撰文：布偉倫

攝影：林子聰、布偉倫

模特兒：Josephine Jim（M.Spy Model）