飲食名人 初二蒲點

大年初二,事事如意!相信好多人今天都會與親友團聚,竹戰睇煙花食開年飯,熱熱鬧鬧歡度佳節。聚會怎少得美食?有人會親自下廚,煮餐愛心盛宴招呼親朋戚友;亦有人早早搵定靚餐廳,乾手淨腳食得自在。還未有節目?不如看看城中8位飲食名人今天的開年好節目!

甜姐兒1號Suki:大魚大肉開年

最近大熱甜品節目主持徐淑敏Suki,新春都會甜甜蜜蜜。問她有何飲茶心水,她自爆是利苑酒家的粉絲,尤其愛酒家的雪嶺餐包,流沙奶黃加包上的脆皮,又鹹又甜的,非常好味。晚飯呢?雖然老公是多間食店的老闆,但今天卻不會「落區巡舖」,反而與親友們在家中團聚。有個識飲識食的老公,Suki過年自然不用操勞,由老公全權負責買餸,以最靚食材招呼客人,更透露一定會大魚大肉,在家中看電視睇煙花,享受天倫樂。

甜姐兒2號糖妹:度身訂造蘿蔔糕

同樣因主持甜品節目而與食拉上關係的糖妹,雖然新春期間家人不在香港,但她絕不孤單,會到拍檔阿峰的家作客。她指峰爸爸親手炮製的蘿蔔糕是她最愛:「峰爸做的蘿蔔糕超好食,而且係為我度身訂造,我仲可以要求多些蘿蔔或臘腸添!哈哈!」

對於今晚的煙花匯演,糖妹指興趣不大,而且非常怕逼;她寧願與朋友坐低歎杯咖啡食個甜品。首選大角咀的Black n White,乳酪又香又滑,法式Pancake更好睇好食。

黃宇詩:必食「十樣菜」

經常跟食家周圍食的黃宇詩,每年新春都例必吃媽媽煮的「十樣菜」,這其實是一碟以不同蔬菜煮成的齋菜。至於團年和新春的晚飯,其中一家心水店是「北京樓」,必點北方家常菜「和菜戴帽」,當中有肉絲、冬菇絲、粉絲和紅蘿蔔,上面蓋上雞蛋,以餅皮包着吃,好有特色,又有意頭。

美女廚神Kit Mak:食得挑剔

有「美女廚神」之稱的Kit Mak,過年好「黐家」,甚少外出食飯,皆因一屋都是廚藝高手!不過她新年都會歎一盅兩件。她的首選是大圍的「粵軒」。雖然不是大酒家,點心卻做得出色,好似皮蛋牛肉腸粉、用煎香的蝦餅做餡的迷你Burger及以蛋皮包着的煎糯米雞等,創新得來好美味。間中她會反傳統吃Pizza,她最愛的,是PizzaExpress的Four Cheese Pizza。

飲食狂人徐蒝:翹埋雙手等食

向來對飲食充滿熱誠的徐蒝,今天會罷工唔煮!皆因每年的初二,她的哥哥都會親自下廚請客,她大可翹埋雙手等食!不過,她每年都會親手做蘿蔔糕送給親友,用有機蘿蔔,以石磨磨爛,再加上瑤柱和黑豬臘腸等炮製,蘿蔔味道超濃,味道一流。出位的她,更會打破傳統,以紅蘿蔔做糕,配上臘味和冬菇等材料,別有一番風味;果然不愧為飲食狂人。

囍宴掌舵人Jacky:招牌湯丸應節

Jacky Yu過年會與家人留在家中輕鬆度過,佢話:「平時煮得太多喇!過年只會炮製簡單菜式,雞同魚就必定有。」至於甜品,他會吃自家出品的招牌湯丸,有綠茶芝麻湯丸和以花生、鹹蛋黃、芝麻和糖冬瓜做餡的黃金湯丸,皆因新春食湯丸,有團團圓圓的意思,夠晒應節咁話。

食神梁文韜:連走3場

飲食節目主持人兼元朗大榮華酒家老闆梁文韜(韜韜),年初二會連走3場!分早、午、晚到其位於九龍灣、元朗及銅鑼灣的酒樓主持大局,與熟客打招呼兼拜年。他更會與伙記在店中齊齊食開年飯,「發財好市」等意頭菜一定不會少。

名廚Ricky Cheung:開工飲酒

名廚Ricky Cheung每年初二雖然都在工作中度過,他卻非常享受,尤其可與餐廳的客人齊齊摸酒杯底,寓工作於娛樂,好開心。收工後,他則會與同事們去打邊爐當食開年飯,大擦麻辣火鍋,因為湯底紅卜卜,好意頭喎!

撰文:李文雅