大年初一出門旺運全攻略

壬辰年整體運程

師傅話未談個人運程前，先預測一下整年大事。「2012年歲次壬辰，天干屬水，地支屬土，生肖屬龍，卦象屬乾，由於天干受地支所剋，社會上鬥爭不斷、戰事持續，而壬辰年上水下土，水主動、土主靜，亦顯示天有動象，天災人禍、意外頻生！此外卦象屬乾，乾為武曲，同時代表戰事、鬥爭、動盪不斷發生！加上天災亂事之後會出現大量無辜難民，需要各方援手，我們應該有同舟共濟嘅心。乾卦亦代表男士的勢力抬頭，政府管治能力大增。行業方面，原材料、農作物、畜牧業、建材、地產、保險、零售、交通、物流等等會較為穩定。此外，今年小心會有傳染性疾病和瘟疫盛行，務必格外小心！」

最佳出門時間

出門拜年嘅時間，最好就係上午九時至中午一時，其他時間都認真麻麻，如果冇打算出外拜年，呢段時間出外走走，沾沾吉祥之氣，亦都唔錯！但應該走乜嘢方位，至可以改運添福，咁一定要留意下面嘅介紹！

今年運程麻麻，口舌爭鬥不斷，大家記緊以和為貴。	呢個時間出門口，一定掂硬呀！	留意師傅介紹嘅拜年攻略，一定事事順利，得心應手。

旺運有方法

初一遇上破日，本應大事不宜，但適逢大年初一，好多朋友都百無禁忌，仍然會出門跟親友拜年，原本出門時向東南喜神方位走一轉，就可喜氣臨門，但可惜今年五黃星正值東南方，於是退而可向南方走借財神之氣，但今年三煞星在南，此處亦不宜借氣。以下介紹四個方位給大家出門借氣，而且每一方位都有佢嘅特別功能，可以增強大家運勢，添財添福添好運。

向西北方走至銀行嘅提款機前，撳啲錢出嚟代表生財有道。	想升職嘅朋友走上高樓或面向大海都可借運。	想學業進步嘅朋友就要向正東方走至報攤買本圖書嚟增運。

西北求財

今年九宮飛星流年財位係西北方，西北屬乾宮，五行屬金，顏色係白色，所以大家想求財可以朝西北方一直走，要去乜嘢地方呢？最好去銀行，銀行愈大間愈好，能夠有多部提款機嘅就最理想，喺度攞少少現金，然後用白手巾或紙巾包住袋喺身上，咁樣就會借到西北方乾宮嘅財氣，話唔定由年頭發到年尾，其中尤以男主人借最有效果，至於老婆仔女都想借，咪男主人多少少錢，一人包一封利是嚟借運囉。

放大圖片	放大圖片	出門前衣服嘅顏色都好重要，一定唔可以着錯。

正西求升職

今年九宮飛星流年武曲位係正西方，正西屬兌宮，五行屬金，顏色係白色、金色，求事業有突破嘅朋友，可以出門時往正西走，去一啲有玻璃升降機嘅地方，然後坐到上最頂樓，上到頂樓，最好可以望番落地，你就有高高在上之勢，旺足一年。此外，去海邊望海都可以，同時正西除咗求升職外，仲可催旺丁財運。想求子，就走去有小朋友嘅地方，同佢哋親近吓，就會借到丁氣。

正東求文昌

今年九宮飛星流年文昌位係正東方，正東屬震宮，五行屬木，顏色係青色、綠色，今年想求讀書聰明、考試順利嘅朋友，可以出門往正東方走，如果係想提高小朋友讀書運，行至報攤買本書給他們攞住就可以，如果係想提高考試運嘅，就可以去買支筆，金色筆就最好，如果係大朋友嘅話，同樣買本雜誌跟身一日就可以。此外，當日買嘅書或筆，最好回家放在書房嘅正東位以增強運勢！

東北求桃花

今年九宮飛星流年桃花位係東北方，東北屬艮宮，五行屬土，顏色係啡色、黃色，所以大家想借東方右弼星嘅氣，建議出門就向東北方走，走去大型商場，人流愈多嘅就愈好。求姻緣運嘅朋友要留意，男仔求女仔嘅就揀個靚女售貨員買吓嘢，女仔求男仔嘅亦都一樣，新正頭第一日就遇上靚仔靚女，今年異性緣一定會大增，至於只想求人緣，咪留喺商場打個白鴿轉囉！但記住要笑口噬噬至有效果！

拜年小禁忌？

傳統大年初一，有以下小禁忌，大家一定要留意。

1. 禁殺牲：農曆年初一係彌勒佛寶誕，好多朋友都會守齋戒殺，初一菜式，很多都係齋菜或者預早幾日做定，去到親友家食齋嘅話，千祈咪詐型，入鄉隨俗就可以。

2. 打爛嘢：小朋友去拜年，好多時都會四處亂跑亂撞，一唔小心就會撞倒或者打爛嘢，有人認為會帶嚟惡運，所以萬一真係打爛嘢，最好講句百無禁忌就可以化解。

3. 忌掃地：年初一拜年期間就算整污糟咗地方，都千祈咪攞掃把出嚟亂掃，咁樣會帶嚟衰運，特別係去人哋屋企，所以萬一整污糟地方，都係用紙巾抹咗佢就可以。

4. 講錯嘢：拜年期間中國人總喜歡講啲好意頭嘅說話，但有啲朋友講嘢會口沒遮攔，講咗啲唔吉利或者粗言穢語，大家應該要馬上道歉，講番啲好意頭嘅說話。

5. 拆利是：拜年時長輩都會派利是，但有啲小朋友會當面就把利是拆開，原來係好冇禮貌同埋唔吉利，所以父母一發現，就要用吉封藏好，待回家才拆。

6. 未瞓醒：有時去到親友家，有啲小朋友未睡醒或者晚輩因病臥床，原來都不宜向佢哋拜年，否則佢哋整年都會臥病在床，未瞓醒嘅就由得佢哋瞓醒再拜年都唔遲。

7. 勿吵架：新正頭大家都應該喜氣洋洋，一團和氣，所以遇到乜嘢事都好都要忍吓，千祈唔好因小事就怒火攻心，一吵架起嚟就會大家傷咗和氣，帶嚟厄運。

8. 莫醉酒：親友難得見面，大家少不免多喝兩杯，但千萬咪飲醉酒，一來身體有損，二來醉後胡言亂語，就會破壞拜年嘅氣氛，飲酒要節制，一定要適可而止。

衣服要配合

師傅話新正頭拜年，衣服嘅顏色亦十分重要，至於乜嘢顏色先至適合自己，增加運勢，可以以大家嘅生肖五行嚟分別，生肖屬虎、兔嘅朋友屬木（青、綠色），生肖屬蛇、馬嘅朋友屬火（紅色），生肖屬牛、龍、羊、狗嘅朋友屬土（黃、咖啡色），生肖屬猴、雞嘅朋友屬金（金、白色），生肖屬豬、鼠嘅朋友屬水（黑、藍色）。

撰文：布永德、余家洋　攝影：陳世昌

模特兒：Patrick、Vincent、Barbara、Kathy@Talent 100　鳴謝：玄學家寶源師傅