剛過去的聖誕，貫穿深圳北站到廣州南站的廣深港高鐵「突然」通車，只需要35分鐘便可由深圳去到廣州，比搭開的廣深動車組，由深圳火車站搭到廣州東站要69分鐘快近一倍，去廣州食買玩都快手好多！
廣深港高速鐵路原本設有7個站，由香港西九龍站出發，途經福田站、深圳北站、光明城站、虎門站、慶盛站，終點為廣州南站，但由於香港站未搞掂，預計2015年先至竣工，所以目前只開通深圳北站到廣州南站路段。高鐵鐵路的設計較筆直，唔似原來火車鐵路咁迂迴，所以只需35分鐘便可由深圳直到廣州，比搭動車快近一倍。高鐵車票在價錢上亦有優勢，由深圳北站到廣州南站一等座為100元人民幣，二等座只需75元人民幣，比動車組平。當然，搭高鐵上廣州都要預時間由香港到深圳，亦未必及得上搭直通巴士（約需3小時）咁就腳。另一個問題係高鐵站未必近市中心，正如廣州南站距離好有異國風情的沙面，或最旺的上下九步行街，都需乘車20~30分鐘，反而去番禺較近，所以搭唔搭高鐵去廣州玩，就好視乎大家的目的地。
新高鐵通車會唔會係一個令大家北上玩樂的誘因呢？旅遊專家陳俊偉認為視乎各人需要而定。「最重要視乎行程是否配合，而且我比較注重安全問題，就算係外國的高速鐵路都好，最好都係等佢運行3個月或半年後先會乘搭。」不過陳俊偉都認同搭高速鐵路比搭內陸飛機有一定優勢，「可以慳番往返機場的時間，亦唔需要適應Jet Lag。」電台旅遊節目主持小驢也認同，乘搭高鐵與否，重點是按需要而定。「搭乘『短途』高鐵都會考慮，如由廣州搭乘到武漢等短線，但如北京開往上海的京滬高鐵線，由於路程較遠則未必會搭。」小驢指出，內地高鐵的舒適程度跟德、法等先進國家差唔多，但乘客的自律性卻有待改善。
大家到日本及歐洲自由行時，都有機會搭「子彈火車」穿越不同城市，有些甚至比搭飛機省時，值得推介。
通車年份：1964年
服務地區：日本
最高時速：443km/h
短 評：如由東京搭新幹線到大阪只需約2小時36分鐘，快過搭內陸機兼進出機場的時間，如揀搭高速巴士更要10小時以上。
通車年份：2007年
服務地區：台灣
最高時速：315km/h
短 評：由台北到高雄需時約1小時36分鐘，即使南北玩勻台灣全島亦無不可。
通車年份：1981年
服務地區：法國
最高時速：574.8km/h
短 評：小驢指出，由巴黎到里昂乘搭TGV高鐵只需約2小時，比搭飛機省時，冇理由唔搭。
各地的高鐵公司都會推出紀念精品，以卡通或特色圖案融入高鐵模型、生活用品等，大部分可於當地的指定精品店及官網售賣，可說是鐵道迷旅遊的最佳手信，惟有些限量版金銀幣及模型，由於限時推出，便要自行到拍賣網搜購了。
用上今年3月開通的九州新幹線Tsubame列車外形而設計的精品，其實是得獎燒酎「彩葉」，真係估佢唔到。
1,980日圓（約港幣$198.4）
為紀念九州新幹線開通，印上N700系Mizuho號跟Sakura號及E5系列車的顏色鉛筆，一套15支。
1,500日圓（約港幣$150.3）
網址：http://www.rakuten.ne.jp/gold/jrk-shoji/goods.html
700T列車4輛套裝，收藏之餘還可以在模型軌道上行走。6,000元台幣（約港幣$1538.5）
較便宜的選擇有台灣高鐵700T列車造型鎖匙扣。
250元台幣（約港幣$64.1）
網址：http://www.700t.com.tw/
京滬高鐵CRH380和諧號動車組1:87模型，最平炒價都要500元人民幣以上。
中國人民銀行今年6月發行京滬高鐵開通的熊貓金銀幣套裝，紀念價值甚高，最低炒價都要5,800元人民幣以上。
日本雜誌分類極為精細，既有單車、飛機等月刊，當然唔少得他們日常接觸到的鐵道雜誌。當中最具人氣可算是《鐵道Fan》，新幹線自然是雜誌的主題，如2011年9月號加入「九州新幹線各驛停車特集」，12月號亦有「新幹線最前線2012特集」。
《鐵道Fan》最新一期已出到2012年2月號。1,200日圓（約港幣$120.2）
撰文：布偉倫