Board Games 娛興好節目
聖誕節長假期後，即將迎接除夕、新年，又係時候約埋班朋友「開P」聚一聚。其實派對除了打機、鋤Dee和打牌外，今年想玩得有新意，不妨拎部iPhone出來玩電子版Board Games。今次小記精選了幾款過癮又得意的桌上遊戲畀大家，包括經典的《Monopoly》、搞鬼的《King of Opera》等，一於同班Friend齊齊App番晚！
《MONOPOLY Here & Now: The World Edition》經典大富翁
擲骰、買地、收租、破產，「大富翁」相信大人細路都玩過，今次這個經典的回合制遊戲轉戰iPhone平台，同樣支援1~4位玩家，除了可以圍埋一齊喺同一部iPhone度輪住玩，還可經Wi-Fi連線對打，隨時開戰都冇問題！而且這App特別加入體感操作，例如搖動機身便可擲骰，模擬實體桌上遊戲玩法，相當有趣。
售價：0.99美元（折約港幣$7.7）
《Mancala: FS5（FREE）》 算術棋藝
玩回合制遊戲需時頗長，若果想快快手同朋友嚟個對決，大可嘗試玩法簡單的《Mancala》寶石棋。有別於一般象棋、黑白棋，寶石棋極考玩家的算術能力，皆因兩名玩家需要輪流從小洞內將棋子分配到己方的基地台內，當最後一粒棋子落入基地台時，會獲得多一次Free Turn機會，還附有食棋等小規則，最終獲得較多棋子者勝，計數叻肯定有着數。
售價：免費
《King of Opera》音樂歌王
音樂遊戲大多是考節拍，《King of Opera》雖然以音樂為主題，但玩法就過癮得多！支援1~4名玩家，各人將扮演熱愛歌劇的肥佬國王，可惜舞台Spotlight只會照射正在唱歌的國王，其他玩家要設法將對手撞落台爭取獨唱時間。遊戲共有3回合，每個回合90秒，最終在Spotlight下獨唱時間最長的玩家便是勝方。
售價：0.99美元（折約港幣$7.7）
《Catan》策略卡坦島
於外國極Hit的策略遊戲《Catan》，最少要3名玩家參與，其背景是一個資源豐富的「卡坦島」，各玩家需要開發自己的領土，透過爭奪資源如穀物、羊毛、磚、木材、礦石等進行擴展。最好玩之處是玩家除了要將手上資源好好利用外，更要不時與其他玩家交易和合作，從而得到適合的資源搞建設，成為卡坦島霸主。
售價：4.99美元（折約港幣$38.9）
撰文：林子聰 部分攝影：陳富權