即刻Check in！米芝蓮新星

名廚隱身法國小店

若不在大街大巷，開餐廳或許沒任何地利優勢，灣仔一幢商廈，竟有米芝蓮食店成功彈起——法國餐廳Mirror。餐廳去年開業，老闆之一兼行政總廚Jeremy Biasiol，挾着師傅Alain Ducasse之名，一登場即引來注目；然而，要成功還得靠個人實力。Chef Jeremy 14歲入行，師傅個個有名：La Mere Brazier、Pierre Orsi、Paul Bocuse、Georges Blanc及Alain Ducasse……以往効力的亦全是米芝蓮星級食府，履歷表超靚，廚藝毋庸置疑。

打從入行開始，Chef Jeremy便許下奪星宏願，今次夢想成真，他說：「Dreams come true！」還自爆收到官方賀電時，喜極而泣，更即時打電話向法國的雙親報喜！

餐廳環境雅致，淺藍色調很討好，Chef Jeremy說要營造家的感覺，親切、舒服。	餐廳老闆之一兼行政總廚Jeremy Biasiol，來自法國里昂，曾跟隨師傅Alain Ducasse達11年，先後到過巴黎、蒙地卡羅及紐約等地工作。今年初進身為法國藍帶美食會Commandeur de la commanderie des cordons bleus de france，廚藝早已備受肯定。	送給客人的自製Macaron。

廚藝好，也得靠靚食材配合，以為他只挑法國貨，這位法國大廚卻撐本地貨，蔬菜田雞大蝦大蜆，大讚新鮮高質，更有助減少碳排放，支持環保咁話！每日走勻灣仔、銅鑼灣、中上環的街市買餸，唔靚唔買，更由一班曾是他學生的年輕大廚協力，炮製出精彩的現代法國菜，他將這次榮譽歸功各人，表示會繼續做好，期望明年再奪星。

Slow Cook Eggs with Garlic Cream, Shrimp, Watercress Mousse and Shrimp Sauce （Mirror Signature Menu 每位$698起） 慢煮蛋超滑溜，鋪上蒜頭忌廉及西洋菜汁，另有鮮甜大蝦，全部拌勻食，變出好多層次！	Prime Angus Beef Filet with Potatoes, Garnish with Scallions and Sour Cream（Mirror Tasting Menu每位$998起） 將美國Prime級安格斯牛柳煮至Medium，入口嫩滑，蘸點燒汁及紅酒汁，更惹味！	Chocolate Caramel Parfait with Crispy Biscuit（Mirror Tasting Menu每位$998起） 甜品向來受歡迎，朱古力加上焦糖，甜得令人滿足！

地址：灣仔灣仔道197~199號天輝中心6樓

查詢電話：2573 7288

上樓睇星星 師傅仔＠灣仔Mirror 20人讚好！

師傅仔： 食到喇食到喇！Yeah！終於食到新入選米芝蓮1星餐廳！:D

HALAM：嘩！環境係咪超Grand？

師傅仔：唔係喎！超細！得30幾個位，但環境唔錯，係逼少少啫。^^

Sman：環境都算有設計啦。你食咗咩？

師傅仔：依家食緊頭盤，用低溫慢煮的蛋，滑滑 :p

皮皮：貴唔貴？散點定叫Set？

師傅仔：無散點！淨得2款套餐，最平每位$698（4道菜，要加一），價錢視乎菜式數目而定。

Sman：咁少選擇？咁咪食到悶？:(

師傅仔：No la，餐牌會時時轉！嘩，好多客人恭喜大廚攞星呀，佢勁開心！仲滿場飛添，Charm！XDDD

YY：講到咁好，等我Book位聽日食先。

師傅仔：餐廳星期日唔開，平日亦只做晚市。而家摘埋星，肯定勁多人！呵呵！:p

YY：><

全球最高中菜廳

這裏沒有高處不勝寒，只有美不勝收，貴為全球最高中菜廳的天龍軒，就在香港麗思卡爾頓酒店102樓，望出去一片晴空，更可俯瞰維港靚景；室內設計由日本名師操刀，將典雅、摩登融合，格局非一般。菜式亦甚有驚喜，主廚劉秉雷就首創以西班牙黑毛豬肉做叉燒，腍滑又富肉香，連帶叉燒包、叉燒腸粉、叉燒酥都用上靚豬，還有不少新派食材做的點心，像和牛煎鍋貼、摩利菌鳳眼餃、松茸腸粉等，好出位。

地址：九龍柯士甸道西1號環球貿易廣場

香港麗思卡爾頓酒店102樓

查詢電話：2263 2270

高空同星星Say Hello 皮皮@香港麗思卡爾頓酒店天龍軒 10人讚好！

皮皮：Wowowowow！呢度好高好靚呀，近到可以同d雲Say Hello！

咩咩：有咩推介？

皮皮：用黑毛豬肉做的叉燒，好腍好滑，加埋桂花糖，好幽香；仲有和牛煎鍋貼、摩利菌鳳眼餃、松茸腸粉，好搞鬼><

Pam：咁古靈精怪，得唔得？:-O

皮皮：OKo架！今年一登場就攞咗1粒米芝蓮星星，好威水！點心做得好，配搭好似九唔搭八，但味道幾好。^0^

Pam：咁等我今個星期去飲茶先。:D

睇靚景食阿一鮑魚

有誰不知道一哥楊貫一的大名？你可能認識由他主理的富臨飯店，但其實尖沙咀的阿一海景飯店，亦屬他旗下。有一哥，自然有他最拿手的美食，招牌菜就有阿一招牌沙鍋炒飯、紅酒醬炆牛尾、招牌脆皮炸雞及吉品鮑魚32頭四寶。餐廳位處商場29樓，無敵靚景亦是賣點，夜幕低垂，對着維港景色品嘗美食，米芝蓮「密探」應該都被迷倒了。

地址：尖沙咀彌敦道63號國際廣場29樓2902店

查詢電話：2328 0983

無敵維港景送飯 Kasgo@尖沙咀阿一海景飯店 8人讚好！

PAMPAM：嘩！超靚景！

Kasgo：係呀！29樓個View好開闊，仲睇到幻彩詠香江！XDDD

MAMA：有咩好嘢食先？係咪超貴？

Kasgo：最正梗係鮑魚，但太貴食唔起！ToT我食緊其他招牌菜炆牛尾、炸雞、炒飯……水準在一般高級中菜廳之上。

PAMPAM：有靚景有好嘢食，都唔滿足！晒命><

層層疊新派中菜

在城市花園酒店的中菜廳「粵」，亦是其中一間剛榮獲米芝蓮1星的餐廳；2008年開業，主打傳統粵菜及廣東美點，還多次奪得美食比賽的獎項，像招牌菜「雪嶺紅梅映松露」，就勇奪2010年度「美食之最大賞」中「海鮮 ——魚、蝦、蟹」組的至高榮譽金獎，猶如層層疊般，賣相靚又好味。餐廳更不時轉換菜式，像近期便有秋冬滋補系列，一點都不老套。

地址：北角城市花園道9號城市花園酒店1樓

查詢電話：2806 4918

去酒店食得獎菜 HALAM@城市花園酒店1樓「粵」 10人讚好！

妹豬：呢杯咩嚟？咁靚嘅？:p

HALAM：雪嶺紅梅映松露，有幾層蒸蛋白，上面有釀了花膠的東星斑，招牌得獎菜，好架勢！hehe

師傅仔：睇唔出原來咁複雜，請我食！XXXXD

HALAM：hehe，我仲有試新出品，侍應勁推介秋冬滋補系列。

HALAM：即係用花膠、鮑魚、海參及鮮人參等做材料，我食咗鮑汁扣原件花膠及滋補佛跳牆。Yummy >3<

Cassie：下次帶埋我去><

撰文：楊淑英

部分攝影：林資凱