ToNick 幽默化怒氣

因一首網上熱播的《Last Christmas》認識ToNick這支Punk Pop獨立樂隊，歌曲講述聖誕夜兄弟借錢不還，連女友都畀人撬埋，慘情指數直逼電視劇中那位被Band友兄弟吃掉的家明，但歌曲旋律輕快，歌詞抵死啜核；再聽埋《三幅被》、《戒戒煙》、《關心菊英》等作品，發現ToNick的歌詞不無八十後的怒，只是他們捨棄咆哮，反以幽默方式「化」了，創意與EQ更高，難怪獲音樂監製趙增熹賞識。

音樂記事

有留意獨立樂隊的朋友，對ToNick應該不陌生，樂隊由阿恒（主音/結他手）、小龜（結他手）、Ryan（低音結他手）及晨曦（鼓手）等四子組成，他們相識於PolyU Muso，各自修讀不同科目，期間有人全職抄功課Hea玩，有人讀了5年才畢業，但講到夾Band，無不幹勁十足，並在小龜和阿恒的牽線下走在一起。樂隊最初叫Mr. ToNick，期間又出現過可樂兵團、動力火車頭等搞事居多的名字，最終決定以「To」+「Nick」行走江湖，意思顯而易見，就是用音樂去記低一些事。

炒散度日

大部分樂隊的組成都是朝向同一目標，就是希望參加比賽、創作自己的作品，ToNick也不例外。2007年，四子參加了UMC音樂節，不但贏得冠軍，更獲得伯樂趙增熹的賞識與合約。「比賽之前，主要做吓Freelance，即係『炒散』，跟趙生簽約之後……都係炒散！但規模大啲，期間我同小龜有幫人做錄音，依家就一齊搞Band房。」主音阿恒解釋：「要留喺音樂圈子生存，真係好困難，所以要一路諗辦法，令自己唔好脫離音樂。試諗吓，如果走去做『扭蓋員』，就冇得搞音樂o架喇！」原來讀醫療化驗的Ryan，曾於實驗室工作，每天扭開500個樽蓋做Test，自此常被譏為「扭蓋員」。

創意無窮

訪問期間，四人不時呻窮，尤其是組Band初期的日子，但能夠繼續玩音樂，已足夠令他們笑着回味。去年，ToNick終於擁有第一張唱片《Let's Go》，看見其紙皮包裝，明顯是No Budget之作。「的確係Budget問題，但我哋又想畀到啲嘢人哋睇，於是度啲計令到成件事豐富啲，而且紙皮同我哋又幾襯，成本又低……」事實上，在四子身上，沒有「No Budget No Talk」這回事，皆因他們懂得食腦，沒有千萬宣傳費，一樣可令媒介知道樂隊存在。最爆一次是試圖在電視台早晨節目的交通報道鏡頭前舉起ToNick的Banner，結果成功博得2秒曝光！他們又會自拍MV，拿起結他到港鐵電梯、星光大道唱歌引人注意，成本不到100元，當然也會引來驅趕呢！

過癮至上

聽ToNick的歌，詞是最大的亮點，寫得直接又夠中：像《李老闆》中「每個月電費電話費都交畀佢，供到死間屋都係李老闆家產……」，唱盡小市民心聲；又如《三幅被》中「唱嚟唱去都係嗰三幅被，唱嚟唱去唱到無晒轉機……」，則嘲笑失戀者只會將慘事放大自頹……原來四子對於歌詞十分執着，務必寫到令自己覺得好玩過癮為止。「依家啲歌詞，好多都寫得好婉轉，其實人講嘢係好Straight forward，我哋玩嘅曲式比較適合呢種填詞方法，你睇，軟硬同許冠傑啲歌詞，依家仲有人記得，就係因為夠口語化。」小龜說。

毋須磨合

跟ToNick做訪問，既會笑死又會激死，他們全程你一句我一句，小記幾乎插不上口，做完訪問也不覺自己做了訪問，但從中也可看出四人性格各異，Ryan最愛煽風點火，阿恒剛烈忍唔住頸，小龜則最擅長賴皮，惟獨晨曦看來最冷靜，問他們在合作時如何磨合？一直很少表態的晨曦終於開口：「我覺得音樂人係冇得磨合，一定要各自有啲唔同，先搞到啲嘢出嚟。如果大家嘅性格都一樣，淨係我一個搞就得啦，仲使乜其他人？如果大家唔鬧交，睇落好似溝通到，但反而未必係好事！」性格愈相似，愈沒有火花，無聲勝有聲？ToNick則相信成員之間愈嘈愈有勁！

後記

如果「人吃人」的橋段發生在ToNick身上，誰會是「家明」呢？

Ryan跟阿恒齊聲說：「晨曦囉！」點解？「講大隻，一定係晨曦同小龜，但小龜太肥膩，唔係咁健康，晨曦就半肥瘦，又夠白淨，好似和牛，肉同脂肪比例啱啱好……」坐在一旁的晨曦，一路沒有發表意見，問他覺得誰會是後生版黃德斌，他說：「應該係阿恒啩，成日病，又好易發癲，跟住就會整傷其他人……」轉個頭又唸唸有詞：「都唔知點解要食佢（家明）……」

撰文：梁穎恒　部分攝影：胡淑儀

部分相片：由受訪者提供