銅鑼灣升級Okonomi-yaki

環境：唔會逼逼狹！

嘩！走進去，第一個印象係，好大！我在大阪光顧的大阪燒專門店，地方又小又擠迫，這可能與大阪燒是平民小食有關，當地的店子小，設計簡單，逼逼狹但氣氛好熱鬧。相對，這裏地方夠大，樓底高，感覺較舒適；座位也有得揀，人少少來到，可選吧枱，人多揀散座，靈活有彈性。最愛吧枱旁那又軟又大的高身座椅，超級舒服，可媲美許多高級日本餐廳。加上抽風系統好完善，吃完不會全身都沾上油煙味，配套咁全面，奄尖的香港人會好受落。

氣氛：差一截！

不過，舒服的代價，就是氣氛減半！當地的大阪燒店可讓客人動手DIY，這裏則全程由師傅操刀，愛玩的客人大呼無癮！幸好這裏甫開張已吸引不少居港日本人幫襯，更晚晚爆場，日語滿天飛，彌補了氣氛上的不足。與日籍店長村本光史「雞同鴨講」閒談，才知道他曾於大阪學做大阪燒。不知道水準如何？

放大圖片

放大圖片

師傅手勢：純熟！

打開餐牌，大阪燒配料與當地差不多，也許是迎合香港市場，還有小食、炒麵、烏冬和奄列供應。炮製大阪燒的材料除了有麵粉、水、雞蛋、椰菜和豬腩肉外，這裏亦有海鮮、年糕、拉麵等選擇，啱晒心多多的香港人。坐在吧枱欣賞師傅表演，好精彩。他手勢純熟，一反一壓即做出靚靚大阪燒，配料不會散收收，客人也不用久等。

豬肉大阪燒加麵 $78	葱燒餅 $78	芝士蛋奄列 $48 芝士蛋奄列是日本近年的流行小食，很多食店都有供應。雖然膩口，但用錫紙放在鐵板上Keep Warm，無論幾時食都有流心效果，細心。

大阪燒：Oishii！

趁熱！大阪燒的粉漿和配料比例算恰當，感覺不膩滯；口味也對辦，沙律汁燒汁下得夠狠，甜味重，不會為迎合香港人口味改變，風味正宗。而由大阪燒變奏而成的葱燒餅，以蛋汁、大量葱粒和蒟蒻炮製，餅身較扁，像煎得微焦的蛋餅，入口乾身，蒟蒻則煙煙韌韌，咬口十足，值得一試。

烏龍茶 $18 日本人吃大阪燒必飲冰茶，這裏用的是烏龍茶，加大量冰塊，入口涼浸浸，雖然不是自家製的，但從日本入口，OK啦！

芥辣八爪魚 $38 八爪魚是新鮮貨，又爽又彈牙。芥辣不會太辣太嗆喉，很開胃。

服務：細心體貼

為我們炮製大阪燒的店長，不但專注烹調，亦不忘與坐在吧枱前的日本食客談天說地，面對着我這等不諳日語的香港人，他亦懶理，一邊說，一邊報以友善的笑容。至於其他侍應呢？好殷勤！不停推介及介紹食物，對菜式有問必答，更不時走近食客身旁，探聽需要，都算細心。

最抵讚是價錢合理，至少比起大阪的店便宜約兩三成，畢竟經濟不景，消費是揀選餐廳的重要考慮因素。

撰文、攝影：褚愛琪

地址：銅鑼灣軒尼詩道497至499號永光商業大廈9樓

查詢電話：2591 1281