HTC TITAN巨芒影維港

嚟緊又聖誕又除夕，維港兩岸燈光璀璨，難免要拎部手機出來拍攝一番。惟市場大部分手機不是屏幕細，便是鏡頭配套一般，成像質素麻麻！相比起來，HTC新機TITAN就冇呢個問題，4.7吋巨芒不但配備28mm廣角鏡頭，仲支援大光圈及獨家執相軟件，影維港靚景So Easy啦！

售價︰待定

最大芒Mango

驟眼睇TITAN，真係同「煎Pan」冇咩分別，點解？因為個芒竟然有成4.7吋之巨，解像度亦達到480×800 WVGA級數，莫講話大iPhone 4S成吋有多，更堪稱目前最大芒的Windows Phone 7.5（代號Mango）手機，睇片上網一流！唯一可惜是屏幕用了SLCD技術，顏色及明亮度都未算超班。用料方面，機殼為拉絲鋁合金設計，硬淨得來予人專業感覺，最難得的是厚度僅有9.9mm，配合微微彎曲機背，手感極佳，挽回不少分數。

影夜景一流

咁大個芒，除咗睇片煲劇，影相亦有相當優勢！TITAN配備800萬像素鏡頭連雙LED閃光燈，規格未算頂級，但就對應28mm廣角及全景拍攝，加上支援f/2.2光圈及背照式感光元件，取景更廣闊之餘，補光亦保證充足，最適合影維港夜景。值得一提是它內建了獨家Photo Enhancer功能，可為相片加入昏黃、微光及HDR等有趣效果，影完仲可以即時上傳到facebook，令Snapshot更添趣味！

WP 7.5採用磚頭介面，並全面中文化，用落好快上手。

Photo Enhancer可為相片加入各式特效！

一體成形電池蓋可避免入塵，但換SIM卡時就要成個拆走。

認中文幾準

說回系統，上次Radar已全面中文化，今次TITAN亦唔例外，而且在巨芒幫助下，手寫區差不多2吋半之大。實測寫中文字辨認度都幾高，潦草畫符都認到，但留意佢暫時唔支援香港字，並且沒有倉頡輸入法，未夠全面。至於UI，都是例牌的磚頭公版設計，提供Xbox LIVE遊戲、Office文書處理及OneNote記事等預載「分唇」；此外，廠商還加入了HTC Watch及HTC Hub兩大服務，前者睇到荷里活預告片，後者則定期精選應用程式，唔愁冇App玩！