矚目靚芒 U9GT2 Tablet

國產Android平板電腦的定位，一直以「抵玩」為主，所以造價昂貴的IPS面板，很少會加到國產機上。Cube新一代平板電腦U9GT2，卻在二千元左右的定價，於9.7吋機身引入色彩還原力高的IPS面板，配合仿蜂巢介面和《Shelves》等電子書App，用來睇書煲劇色水夠晒靚。

平睇貴芒

iPad選用的IPS面板，特色係可視角度大和色彩準確，但由於造價較TN和VA等面板貴，所以想喺平價國產機上找到並不容易。今次新機以二千元左右便備有9.7吋IPS屏幕，解像度達1,024×768，睇片時色彩確實比傳統Tablet鮮艷亮麗。而且新機內建《Shelves》App，能連線下載電子書，甚至可開啟電子雜誌、漫畫等，就算係普通PDF檔案，都能配以揭頁的動態效果，睇書時十足拎緊本真書一樣。

長氣薄身

大部分Android機都支援插卡作擴充之用，新機都唔例外，除了支援最大32GB microSD卡外，內存亦加大到16GB，擺入大堆影片和Apps都冇問題。此外，機背採用一體成形設計，雖然不能換電，但內置2枚4,000mAh鋰電池，據官方公布的數字，開Wi-Fi上網大約可跑5小時，而待機時間更長達260小時。實測所見，待機狀態閒置幾天都沒有明顯「走電」情況，而且Keep到10mm纖薄機身，算係交足功課。

售價：$2,180

內置microSD插槽，擴充力不俗。

虛擬蜂巢

新機另一賣點係飛甩晒機面實體按鍵，將它們全部變成虛擬按鈕設於介面左下角，將Android 2.3平台做到似足蜂巢系統模樣。原來這是利用瑞芯微的SDK 2.0技術把UI優化，新增了一個能同時顯示5個主頁及Apps的介面，方便直接拖拽Apps分類。另外，虛擬按鍵除了Home、功能鍵及返回鍵外，還新增一個「檢視頁面」快捷鍵，一按就能睇到執行中的應用程式。若各位嫌機面的「無鍵」設計唔就手，亦可利用機側實體鍵作「功能」及「返回」用途，算是細心。