Tablet P刁芒摺力

Tablet亦稱平板電腦，但這部Tablet P唔「平」又唔似「板」。皆因Sony用上對摺「刁芒」設計，備有兩個5.5吋Multi-touch屏幕，似足NDS咁可以摺埋，一改Android Tablet的沉悶形象。而「刁芒」有姿勢亦有實際，玩PS遊戲時更順手，睇電子書時仲可以直度觀看，更似拎本真書閱讀。只要抱住「早買早享受」心態，這部剛到場的日版Tablet P玩得過！

Sony Tablet P 售價：$5,980

5.5吋屏幕打孖上

Sony踏足Tablet市場時，已公布推出Tablet S跟Tablet P型號，前者的行貨早前已經推出，但外形跟設計更有趣的Tablet P，就要到上月底才在日本推出，行貨幾時見街都未知。新機煞食之處是配備雙Multi-touch屏幕設計，機上兩塊5.5吋芒分別備有1,024×480解像度，組合起來就有1,024×960解像度，畫面對角線約有6.8吋，實際可視畫面都唔算細，只是中央一條橫向黑邊略為礙眼。

玩PS遊戲更就手

採用5.5吋「刁芒」設計有幾好玩？先唔講應用層面，體積較小、重量較輕已是一大好處。Tablet P對摺後體積僅得180×79×26mm，重量更只有372g，比601g的iPad 2輕，而且Size跟一本小說差不多，比喬布斯本新自傳細幾個碼。此外，雙芒設計可容許兩個畫面獨立顯示不同介面，或組合成一個大畫面，如睇相時可以上畫面睇大圖，下方則顯示相簿縮圖。而小記覺得最有趣是玩PS遊戲時，如《全民高爾夫2》會將虛擬方向鍵跟功能鍵設於下畫面，玩落更就手。除橫度玩法外，機身更可配合Android Apps直度使用，如日本專用地圖App《PetaMap》，或從Reader Store網站購買的電子書，都可放到Tablet P直度閱讀。

銀色機殼備有511萬像素鏡頭。

機身不甘平凡，機側以橢圓形設計。

要拆除面殼跟電池才換到microSD卡。

容量縮水可換電

新機除了採用Tegra 2 1GHz處理器外，其餘規格都比Tablet S縮水，最明顯是內置儲存空間只有4GB，就算可用上microSD卡擴充容量，但要裝入大量高清片都頗有難度。而電量方面亦縮減不少，只支援16.8小時音樂播放或6.5小時影片播放，好在今次採用可換式電池設計，若覺得標準電池唔夠玩，還可多買一枚後備電池使用。至於Tablet S上多個實用又好玩的應用功能亦有保留，如對應高清電視以「Throw」推片播放，加設「我的最愛」將常用的應用程式擺入去等，嫌其他Android Tablet欠缺創意，這部Tablet P幾啱大家玩！