空姐空少翱翔苦與樂

旅行搭飛機，總會見到好Nice的機艙服務員，起初都會諗，平日派吓餐就可以周圍飛，仲要有人工收，真係幾正。不過早前小記跟住一班國泰空姐空少飛往東京，體驗佢哋嘅空中生活，雖然短短兩日一夜，但原來他們並非如一般人想像般「歎」。上天落地，人前人後，一樣有打工仔的苦與樂。

人前輕鬆人後忙碌

別以為空姐空少在機艙內行行企企好輕鬆，他們一般都要在起飛前1.5小時到機場開簡介會，了解航班情況。由於他們只比乘客早20分鐘上機，所以一上到去就好似打仗咁忙，要檢查安全設備、餐飲數量、座位物資等。曾為國泰拍攝「打欖球空姐」和「熱心執公仔空姐」兩輯廣告的Grace，今次就係飛往東京航班的機艙服務員，見她推住餐車笑容可掬的派餐，小記遂往服務處一看，已發現小小地方原來有4、5位空姐和空少忙得不可開交，將櫃門又開又合咁預備物資。

飛來飛去有代價

空姐空少可以經常到外國增廣見聞，落地後又可四圍Shopping，機艙事務長Leo與服務經理Gassy都覺得這是令人難忘的經歷，還留下不少快樂回憶！如他們多年前在Business Class遇到一對老夫婦，說是最後一次出國旅行，所以希望可以影相留念。當時未流行數碼相機，花了很長時間才找齊相機和菲林幫他們拍照，能見證這個時刻，感覺十分窩心。而講到做空姐的開心事，Grace覺得除了可以周圍飛外，還可識到很多新朋友，因為每次合作的團隊都可能不同，尤其是飛長途機時，忙碌過後可以一齊傾吓Shopping大計，感覺特別開心。

空姐Grace

這個摺椅只會在起飛或着陸時才會開出來坐。

不過Leo坦言「食得鹹魚抵得渴」，由於工作唔定時，平日較難約到其他朋友，好在公司畀佢哋一個月有5次機會自由「調更」，咁就可以與同事夾一夾互調時間。如想進修的話，Gassy表示，可能要揀選一些不太計算出席率的課程，而且要有更高的自發性。其實Gassy自己便是過來人，之前在公餘時間完成了碩士課程呢！

機艙內不太起眼的一扇門，原來裏面有好多張床畀機艙服務員輪流休息。

服務處不算寬敞，但同時有多位服務員預備食物。

空少Leo

在家Standby壓力大

除了空中工作，原來機艙服務員還有機會在家Standby，準備隨時填補航班的人手空缺，Leo和Grace異口同聲話在家Standby壓力頗大。Grace坦言：「Standby其實都屬於當值時間，雖然可以穿便服，但係要Set好頭、化晒妝。由於公司需要人手時，必定會以屋企電話通知，所以成日都要留意電話，有時聽到少少聲都會以為電話響。」Leo笑說：「我連沖涼時都會將個電話帶入洗手間，方便一有電話就即刻拿來聽。」壓力雖然幾大，但Grace補充：「其實Standby都有一個好處，就係有時間執屋！每逢Standby都係我屋企最乾淨的時候。」原來四圍飛都要付出代價。