7吋MediaPad 細界級影院

近年平板電腦可說完全取代PMP、MP4機功能，成為大家的流動影院，可惜大多機款傾向10吋設計，拎得耐都手仔軟，何況要睇成90分鐘電影！內地大廠華為最近便由手機界踩入平板電腦界，推出首部7吋MediaPad，它不但玩盡Android蜂巢系統，仲內置最Hit的雙核心處理器和3G上網功能，隨時都可以串流煲劇！

售價：$3,980
採用7吋IPS屏幕，可視角度、對比度都不俗。

一體金屬機身

國產機一向給用家山寨Feel，要成功飛甩老套，外形和設計可算是重要一環。因此，7吋MediaPad特別用上一體成形金屬機身，機側邊位以至背殼位置相當滑溜，摸上手仲有少少冰涼感覺，造工一流；難得是用上金屬物料，機身仍能保持400g以下，女士們擺落手袋都唔覺墜手，便攜性不俗。惟要留意，一體化設計令電池不能拆出來更換，充電亦必須使用AC插頭，沒有常見的USB，略嫌不便！

3G隨身睇片

新機叫得做MediaPad，重點當然喺多媒體身上。它預載全新Android 3.2系統，瀏覽器、Android Market等程式一應俱全；加上硬件亦升級至1.2GHz雙核心處理器，配合1GB記憶體，睇Flash播短片都零舍順暢，表現抵讚！另外，新機更內置3G模組，只需插入SIM卡即可上網，最啱喺KKBOX串流聽歌或者上YouTube睇片，完全免卻預先下載的麻煩。

打開底蓋即可更換SIM卡及記憶卡。

備有HDMI輸出，方便駁電視睇片。

16GB「雲」上存

雲端儲存愈來愈普及，華為當然唔執輸，推出名為「華為雲端Cloud+」的服務。只需簡單登記後，Cloud+即免費提供16GB網上儲存空間，相比Dropbox只有幾GB容量龐大得多；而且仲可將檔案Share畀朋友，實用又直接！值得一提是，新機除了備有Android Market外，亦預載多個下載App的熱點，提供大量內地至Hit程式，啱晒鍾意玩新Apps的朋友！