Tablet S推片打機新板斧

市面的平板電腦何其多，但論款式幾乎一式一樣，悶！Sony將於月底推出的Tablet S，卻在外形及功能畀大家驚喜：先以人體工學不對稱「縫針」設計，手感好、易打字，另外更可無線連接電視和音響「推」片聽歌，兼可玩埋PlayStation（簡稱PS）遊戲，其他同類產品一定做唔到。最吸引是16GB開賣價只係$3,888，抵玩！

售價：$3,888（16GB）
$4,688（32GB）

符合人體工學

正面看，Tablet S似塊大芒膠板，但只要換個角度打側睇，便能察覺新機造型似一支大型縫針，這種不對稱設計概念沿自捲起的紙張，更適合人手握持。而且當這上厚下薄機身橫放於枱面時，斜度亦符合人體工學設計，打虛擬鍵盤時感覺更就手。此外，新機配備9.4吋輕觸屏幕，1,280×800解像度畫面恰到好處，配合TruBlack技術提升黑位層次，睇片質素甚有水準。

兼玩PS遊戲

新機採用Android 3.2新平台，已較同級對手Updated，廠方更參與操作介面及應用程式支援工作，特設Select Apps網站，擺放專為Sony Tablet開發的獨家程式。而講到最獨特的功能，可說是對應PS遊戲，新機屬首部獲得PS認證的平板電腦，可下載經典遊戲拎出街玩，早前抵港的水貨版便預載《Pinball Heroes》同《全民高爾夫2》；但今次介紹的行版就唔同，在《Pinball Heroes》外配搭《古惑狼》，前者可直接在畫面觸控彈珠桿，後者則在畫面兩邊操控虛擬方向鍵及功能鍵，手感令人滿意。

放大圖片

將常用的應用程式拉入「我的最愛」，方便開啟。

DLNA推片即播

Tablet S另一強項來自連接性，不但可在9.4吋屏幕睇片，還可將影片無線推送到高清電視欣賞。用家只需利用「Throw」推片功能，經Wi-Fi無線連接對應DLNA的電視，即可串流睇片；同樣原理亦能應用於音樂之上，隨時將機內的音樂，推至無線音響器材播放。機身還設有紅外線發射器，只要配合遙控程式，便可將平板電腦當成遙控器，控制全屋影音設備，實用性強。配套方面，廠方特別為新機設計出插座、屏幕保護貼、USB線、變壓器、藍芽鍵盤、輕便皮套及真皮機套等配件，由即日起至10月19日訂購，配件更可享8至9折優惠。