激薄U9000 4.1吋巨芒角力

提起國產手機，好多人都會諗起山寨貨，印象麻麻。但近年不少內地廠商都於歐洲等地冒起，華為（Huawei）就是代表之一。最近，廠商更一口氣推出多款Android手機，其中以旗艦機U9000最吸引，4.1吋巨芒加上1GHz處理器，規格已經不俗，再加上獨特的方角機身設計，隨時可與日韓大廠角力！

售價：$2,980

方角設計有特色

俗語有云「人靠衣裝」，好多人買手機同樣外形先決。有別於市面一般圓角手機設計，U9000大膽採用黑色方角機身，遠睇已經夠搶眼；難得是新機成塊薄片咁款，卻沒有頂手感覺，加上金屬背殼用料實淨，粗用都唔怕。而最注目當然是內置4.1吋巨芒，解像度達480×800，對比度亦見不俗，睇片時畫面更細緻，可惜屏幕只有26萬色，色水偏淡難免扣分。

睇Flash好流暢

近期Android手機多改玩雙核心處理器，雖然運算速度提升，不過耗電情況變得更嚴重，唔夠半日就要搵火牛。而U9000就實際得多，採用較慳電的Qualcomm 1GHz處理器，換頁、開Apps等操作都相當流暢；並支援Flash Player，睇網頁和短片更原汁原味！另外，新機備有中價機少見的HDMI輸出，方便大家將靚相和短片直出大電視同朋友分享。值得留意是，新機只預載Android 2.2公版介面，想玩特色Widgets惟有另裝Launcher喇！

4.1吋巨芒配合5頁公版Android介面，操控流暢。

背殼採用金屬物料，並備有500萬像素鏡頭。

機前設有4個輕觸功能鍵，反應靈敏。

IDEOS X3及Boulder U8350

華為同場更推出多部中階手機，當中包括IDEOS X3及Boulder U8350，前者採用入門級600MHz處理器，但卻換上新研發的Huawei UI，加入大量3D過場效果之餘，連功能表、主頁以至狀態欄都重新設計，順暢好用。最吸引是預載最新的Android 2.3系統，配合3.2吋屏幕玩Apps上網都夠用！而Boulder U8350走入門商業路線，支援實體QWERTY鍵盤及篤芒操控，覆SMS或者電郵夠晒方便，以$1,680的機價來說，抵玩！