Ana R.錯愛驚情：人生唯一遺憾
世事豈能盡如人意？名模Ana R.事業得意，情路卻波折重重，飽受被前男友跟蹤、意外受傷、打崩牙、失戀暴瘦等可怕經歷。坦言「愛情是人生中唯一遺憾」的她，仍深信對她永遠忠誠的另一半總會出現！
作為第一代在港打響名堂的「混血女模」Ana R.，實力固然毋庸置疑，但要數她為港人熟悉的原因，實屬她與模特兒公司老闆兼張惠妹前男友周立璟的戀情莫屬！拍拖期間，不時爆出周立璟的緋聞，但Ana仍處處維護愛郎；可惜苦心經營的四年感情，最終都未能開花結果。其後，她亦曾與一外籍猛男David拍拖，但戀情僅維持了短短一年時間。「我已經單身咗兩年。無可否認，呢兩段戀情，令我依家對愛情猶豫咗好多。」
本以為Ana承受不了狗仔隊的日夜追訪，所以遲遲不敢展開新戀情，但原來她從不介意戀情被公開，更反問：「我都冇做錯任何事，有乜好怕？」對待每一段感情均十分認真的Ana，坦言自己的情路一波三折，更有不少「瘋狂」經歷。「愛情實在係我人生中唯一嘅遺憾。相信大家都知道，我同周立璟分手後，因太傷心而激瘦二十磅。最令我驚嚇嘅係，喺好耐之前，試過有分咗手嘅男朋友日夜跟蹤我，甚至深夜爬窗入我屋企，瞓喺我隔籬！真係令我覺得好驚、好冇安全感！」愛情除了為她帶來心靈上的創傷外，肉體亦同樣受罪。「其實我有一隻門牙係假嘅、胸骨亦有一條裂痕、手指亦都有小小變形。」直問到是否被男友虐打所致？她顯然不欲多談，只淡然地搖搖頭，唏噓地說：「好多嘢都超出你嘅控制範圍，大家都唔想呢啲事發生。」
絕對不能講大話
種種經歷固然傷透Ana的心，但真正令她對愛情卻步的原因，原來源於大家對她的關心。「分手固然傷心，但係最令我覺得尷尬嘅係，當我行緊街嘅時候，會有啲唔識嘅人走嚟我面前，用好同情嘅眼神，捉住我對手同我講『我都好為你感到難過！你唔好咁唔開心啦！』面對呢啲事，我真係唔識點畀反應。」雖然承受萬般壓力，但堅強的Ana視種種歷練為人生的寶貴課堂，亦令她更了解自己所追求的配偶條件。「我唔需要對方有錢或者靚仔，但我鍾意聰明嘅男仔，可以教識我好多嘢。不過，最重要都係唔可以同我講大話！因為我係一個畀好大自由度伴侶嘅人，絕對唔會check佢電話，又唔會好似貼身膏藥咁黐住佢。但係一旦畀我發現佢對我講大話，我就會二話不說咁分手，亦唔會再有任何聯絡。」
多次被男友求婚
說得如此瀟灑，難道她就不曾心動過？不曾有結婚的衝動？「其實我有四、五次畀人求婚嘅經驗，但每次見到男友跪低，我都會即刻叫佢『Wait！Wait a minute！Stand up！』，喺我十六歲嗰年，同我拍咗拖三、四年嘅調酒師男友向我求婚，但係我拒絕咗佢。之後我就放低一切，去咗日本工作兩個月，佢竟然追我追到去日本！一邊喊住，一邊求我，叫我嫁畀佢，但係我實在係冇辦法答應佢。」至於拒絕的原因，她竟理直氣壯地表示：「我仲有好多嘢想做、想試，暫時仲未願意為婚姻放棄我嘅事業。其實我由細到大都覺得自己會結婚，但係並冇任何詳細嘅計劃，亦都冇限期。」
母40歲後遇真愛
Ana笑言母親對於她的感情狀況亦有微言，並時刻催促她去找個伴，但她自己卻對緣分深信不疑。「其實我媽媽都結過三次婚。第一個爸爸過咗身，第二個爸爸對我哋好差，佢唔係一個理想嘅伴侶，之後就到依家呢個爸爸。有一年聖誕，屋企人嚟咗香港探我，依家呢個爸爸坐低同我講『呢五年嚟，你都知我一直都對你媽媽好好，佢都過得好開心。你可唔可以叫我一聲「爸爸」？』由嗰陣時開始，我就真正咁承認咗佢嘅身份，我哋兩父女仲即席跳咗part舞作紀念！連媽媽都喺四十幾歲嘅時候先搵到佢嘅真愛，令我更加深信愛情要嚟嘅時候，就自然會嚟，急都急唔嚟！」
來港行騷受寵若驚
情場失意，事業卻一帆風順，但原來當模特兒並非Ana的兒時夢想，一切只無心插柳。「我細個嗰陣，住嘅地方治安唔好，星期六、日屋企人陪唔到我，所以將我送咗去附近嘅模特兒學校讀書。」後來，她於美國的模特兒大賽中奪冠，自此便踏上世界舞台，更迅速成為各大著名時裝、首飾品牌的寵兒。2000年，Ana首次來港為大型時裝活動行騷，引來極大回響，她亦坦言有點受寵若驚：「有人同我講『你一定要留喺香港！你一定會成為巨星！』其實我之前冇諗過會留喺香港定居，但係工作接踵而來，就順理成章咁繼續留喺度。」
兩犬作伴增安全感
雖然感情生活空白，但Ana亦不愁寂寞，皆因家中有兩隻寶貝狗——Gucci及Angel與她作伴！她一有空便會帶牠們散步，並會親自炮製既美味、又營養豐富的食物給牠們。Ana坦言自己是一個缺乏安全感的人：「我好怕自己一個人瞓覺，成日都好驚有人會喺我瞓緊覺嘅時候，靜靜雞走入我間屋。不過自從養咗佢哋之後，我成個人安心晒。因為佢哋一聽到怪聲就會吠，話畀我知有危險，令我覺得受到保護。」
採訪：龔凱欣
攝影：沈健程
場地：Indochine（蘭桂坊）