多啦A夢Chok樣雙雄

「多啦A夢，你畀我瞓多陣先。」

小時候玩多啦A夢家家酒，頂多係揸住毛公仔Fing Fing吓，再扮埋佢哋把聲，雖然公仔冇得擺甫士，但相當窩心。如今Robot魂及SHF破天荒Crossover，炮製出可動的多啦A夢與野比大雄Figure，配合大量配件讓各位搵番童年回憶！

SHF大雄的配件較多，其中唔少得棒球套裝。 多啦A夢的面相組件比大雄多。	大雄的面相是整塊更換，玩法簡單。	「貓耳」多啦A夢造型相當少見。

關節靈活動作多

唔好睇多啦A夢四肢短小兼大肚腩，就會笨手笨腳！事關Robot魂版特別在膊頭加入拉出式關節，令多啦A夢雙手能夠向前伸直，做到從法寶袋拎出「隨意門」等道具的動作；另外雙腳亦內藏兩節Ball Joint，圓腳可前後擺動，但露出中空內膽就稍為穿崩。至於SHF版大雄的素體，則繼承早前推出的神奇小子，全身有十多個關節，可動性毋庸置疑。

「超能力帽」能令大雄變得智勇雙全！	膊頭有拉出式關節，增加雙手可動性。	「放大縮小槍」可將東西變大變小。

換面Chok樣吸引

面相多多是新產品另一吸引之處，只是兩款玩具的設計稍為不同。大雄的面相分件比較簡單直接，眼睛和面頰表情一塊過，總共有5款如單眼、伸脷等畀大家換。至於多啦A夢就複雜得多，因為眼睛及嘴臉以分件設計，令表情配搭更多，其中Chok樣必備的貓耳以及傻眼就最受粉絲歡迎，叫佢哋做「Chok樣王」實不為過。

磁石吸件高招

另一個令眾粉絲歡喜的原因，是多啦A夢毋須換手，單靠磁石吸力便能揸實卡通中的「放大縮小槍」和「空氣炮」等法寶，而且多啦A夢跟大雄的頭頂都暗藏磁石機關，方便吸實「竹蜻蜓」及「超能力帽」。這種設計省卻繁複的換件工夫，設計點子夠晒高招。惟可惜SHF大雄多了手指的關係，雙手始終需要換件，有點美中不足。

撰文：廖俊斌　攝影：郭凱敏　查詢電話：2433 1828