Alert！平板魔鏡 法力無邊！
在沒有手機的時代，我們都很樂意行多幾步走入電話亭；當沒有Internet之前，我們都會自願到圖書館搜集資料；還沒有MP3出現時，我們都極願意為CD機帶多幾隻唱片出街。
今時今日，只要稍一唔記得帶手機或者無得上網……頃刻失心瘋！
新一輪的人魔大戰無疑是平板電腦的天下，這塊「高科技反光板」如惡魔手中的「平板魔鏡」，既反照出人類超越時空地域無限可能的吸引魔力，亦會攝取你的靈魂陷入不同程度深癮的無底魔極，各位……你準備好「照鏡」未？
蒙蔽型人‧惡魔
眾所周知Donald出名是潮流先鋒一名，講得出的潮物都必定玩過，當萬眾期待第一部iPad平板電腦行貨時佢已經有喺手。不過，既為名DJ，睇嘢當然睇深一層，所以洞悉平板電腦是潮人為「型」及時代為「快」的產物。
Donald說：「其實好多人都係唔知點解為『型』而買平板電腦，我知道電子書會喺未來日子取代傳統書籍，但現階段嘅平板電腦只係『Kill Time』的玩具，例如睇相睇片玩facebook，可惜未有實際工作用途，甚至可以話係大材小用，所以，對我而言，平板電腦暫時未算是必需品。」
Donald拆解平板電腦的真正作用，雖然唔係無咗唔得，但就Fit正永遠趕時間趕潮流的香港人，既慳時間亦已經成為型人Icon，唔想同社會脫節便難以避免着魔，但唔想走火入魔，就要如Donald般洞悉先機。
踩入女界‧瘋魔
根據調查顯示，就用家性別比率而言，女性使用平板電腦比過往使用Notebook、Netbook數目大增，可見魔力已經開始滲入女界。而每日都要面對客戶的時裝女公關Yan亦漸入瘋魔狀態，認為平板電腦已等同女性必備的化妝品！Yan說：「我以前覺得所有與電腦有關的事都是『很男人的事』，要知道女性的手袋必須要有、亦已有好多化妝品，但手提電腦又重又累贅，絕對是沉重的負擔。」
但是，平板電腦的出現，立即霸佔其生活重要位置，甚至與化妝品看齊，她說：「平板電腦除了可以作多媒體播放、隨時睇電子雜誌等之外，更重要是機身輕巧，去邊都可以同埋化妝品一齊放入袋，而家已經唔用Desktop，全部用平板電腦搞掂！啊！仲有仲有，佢仲係一塊大鏡！係一塊可以Close-up同埋美化版嘅魔鏡！」魔鏡威力，總會有人甘願入迷着魔。
侵蝕自身‧深魔
小記剛入行時已認識Stylist Treeman，他除了讓我見盡潮流造型的變遷外，亦令我見證平板魔鏡如何徹底改變一個人。他說：「我原本係個守舊派嘅科技白癡，一直奉行用紙筆我手寫我心。然而，平板電腦在我而言係一張『高科技白紙』，方便我喺呢個一切都靠包裝嘅世代同客人接觸時，可以將草稿概念變得更工整，亦比手提電腦更輕易做出更順眼嘅Presentation。」
Treeman更說：「老土啲講，平板電腦係繼Call機、電話、Desktop、Notebook，到Smartphone出現後，令我知道原來一部細小嘅物體都可以迅速加強工作成效、方便生活。即使我哋想避都避唔到，可以做嘅反而係配合，亦可以大膽咁講，平板電腦係新世代不可或缺嘅Item。」今日見Treeman已時刻iPad不離手，由當年的「Low-tech死硬派」到全民高呼「你今日照咗『魔鏡』未？」，平板電腦……叫人點敢唔讚好！
狙擊電魔王朝
大眾市「民」情傾「平」板電腦，簡稱「平民」，有關平板王朝的勢力分布及變化走勢都備受關注，甚至風吹草動都引起軒然震盪，亦簡稱「平民腦震盪」，所以，眾生如你我，當然要捕實局勢！
宏觀：板塊移動大勢
板權三國誌
現今平板巿場由iOS、Android、Windows三國鼎立，若只以apps、配件、巿場佔有率等而言，由革命先鋒Apple獨佔鰲頭，但自從Android系統突襲者Google施以全面性夾擊，將程式對外開放予各大品牌搭載後，Windows的改良愈見成熟，令宏觀局勢開始產生微妙變化。
板主繼任人
三大王朝之中，iPad之父Steve Jobs退位，Motorola上月被Google正式宣布收購成為親生仔，除了有優先更新權外，特別待遇亦會陸續有來，淨睇XOOM價錢一直企穩就知！Apple內憂加外患，若沒有青出於藍的繼任人，大國隨時會被Microsoft及Google雄霸！
微觀：平民變化走勢
親民四大
「平民」望住局勢日捕夜捕無非都係想捕心頭好，惟平板電腦品牌型號數之不盡，為了大家荷包着想，筆者找來本報科技版同事嚴選推介四大平板電腦，就係Apple iPad 2、ASUS Eee Pad Slider、Samsung GALAXY Tab 10.1、Lenovo IdeaPad K1，「平民」們，點狙擊？你而家應該識！
風起雲湧
平板電腦唯一唔爭氣嘅就係內存容量有限，不過！此問題相信會在不久的將來解決！事關Apple與Google已經聯手研發利用網絡空間作硬盤的雲端系統，毋須消耗內存或安裝便可直接透過網絡雲端啟動系統。假如系統成熟運行，平板電腦王朝必會更加穩固，亦會為「平民」掀起另一番風起「雲」湧！
魔幻分身術
平板電腦魔力豈止電腦咁簡單，簡直無聲無息咁入侵都市人各生活階層，更分身化成不同的副產品，甚至滲入「平民」的飲食生活！
魔術品
平板電腦出世後，無論專業的配件品牌定時裝品牌都積極設計相關Case、保護輔助或裝飾配件，各式各樣的設計諗得出的都有，價錢亦豐儉由人，令巿場日益壯大不斷升溫！
魔登餐
平板電腦有得玩，更有得「食」！最近在尖沙咀新開的Mi Set就食正水，以平板電腦作點菜Menu做Gimmick，令一間普通的茶記突然潮起來，香港人真係識得食盡「腦」！
撰文：陳捷偉 部分攝影：陳世昌