水上滾筒好玩到飄起

水上狂奔 改良新玩法

想在水面行路聽起來像天方夜譚，不過這款可讓人體驗水上行走的玩意，其實早在幾年前已引入香港，而這種「水上大滾筒」的前身就是「水上步行球」。為何由球狀變成滾筒狀呢？活動負責人畢先生表示：「這種大滾筒可算是一個改良版，之前球狀的步行球每次玩之前都要入氣，只能玩一段短時間，加上密封式的設計亦相對增加了危險性，所以就改良成滾筒狀。」水上大滾筒兩邊的筒口並非密封，內櫳約有2.5×2.5米的活動空間，負重力很高，一般容納兩個大男人同時玩都冇問題，最重要的還是可以持續玩一段較長的時間，唔使擔心「冇氣」。

水上單車 手腳各自出力

除了水上行走外，在旁邊還有兩款較為傳統的水上玩意，分別有水上單車及小型手搖船。場內提供了供4人和2人乘坐的水上單車，踩動車上腳踏便能前進。而這裏有個面積很大的湖泊，同時可容納好多人一起落水踩單車。嫌齋踩太單調的話，可以在落水前買包魚糧，皆因湖內養了不少鯉魚，一邊踩仲可以一邊餵魚。如果踩到腳累，還可以到旁邊的人工水池轉戰以手攪為動力的小型手搖船。這種只能坐一個人的船仔，除了大大份的猛男外，小朋友都啱玩。雙手攪動船內兩側的操控桿前進，單手攪就能控制轉彎，曬吓太陽，吹住涼風在水上漫遊，一個人都可以十分浪漫。

大滾筒的內櫳幾寬闊，一個人玩的話點跳點跑都冇問題。

4人水上單車外形似足小船，較易平衡，唔怕「反艇」。

4式玩法考平衡

這種水上大滾筒充氣後韌力十足，大人捐入去都唔怕踩爆，而即使不小心失平衡都不會跌親，難怪畢先生話：「好少活動可以做到咁，即使咁多郁動，跌低都不會受傷。」這個吹氣玩具的另一個特點就係全透明，捐入去可以清楚見到腳底下的池水，跑動時仲會見到水面的波紋和氣泡，營造出十足十的水上飄感覺。不過話晒都係圓筒狀，喺裏面想體驗水上快跑都需要掌握一定的平衡力和技巧，以下就推介4式玩法畀大家。

雙手攪動控制桿就能推動兩側的螺旋槳，可以當練手臂。	湖裏養了好多唔同顏色的鯉魚，魚糧一灑就會引來群魚環繞。	紅黑色的斜躺車似足一架小型賽車，中間的手掣就用來協助轉彎。

陸地滾球 草上飛

唔想濕身，返上陸地還有其他玩意，這種草地滾球大大個，左右兩邊有一個小洞可以畀兩個人同時捐入去玩。不要以為上咗岸就易玩咗，始終都係一個吹氣圓球，想推動這個大滾球不斷向前滾都需要啲技巧和平衡力；不過好在球內有一些可以借力的把手，方便你發力讓滾球轉動。

前衝式 微微曲腰雙手出力向前推，配合急速步伐，就能快速推動大滾筒前進。	緩步式 緩步慢推，雖然缺乏速度感，但較易平衡，可持續前進一段長時間。	倒後式 腳踭用力前推，很考平衡力，重點是雙手要盡量張開協助平衡。

斜躺車 甩尾飄移

考完平衡力，又可以試吓極速快感。這種斜躺車其實是三輪車的一種，不過玩時要向後斜躺，伸長隻腳踩腳踏，外形則有點像小型賽車。場內提供了一個小型車場供你同班Friend鬥車，不過就要預先熟習一下控制技巧，事關這不是用軚盤，而是用兩個手掣改變方向，想高速入彎都唔係咁易。如果你夠熟練，高速前進時適當地單按一個手掣，還可以營造甩尾飄移的效果，極之有型，十足頭文字D。

瞓身隨意式 行到累索性瞓低，手腳隨意推按，配合外來風力波浪推動，寫意漫遊。	球內空間夠寬敞，可從旁邊的小洞捐入去。	吹氣草地滾球都幾大個，喺入面推佢向前要花些力氣。

活動收費

水上大滾筒：$30 / 10分鐘

水上單車：$40/兩位/20分鐘（按金 $100）

　　　　　　$60/四位/20分鐘（按金 $100）

餵魚魚糧：$10/包

小型手搖船：$30/15分鐘

草地滾球：$30/10分鐘

斜　躺　車：$30/15分鐘

天水圍綠田園

地　　址：元朗天水圍沙江圍側（由天華路入）

網　　址：www.yl.hk/green

查詢電話：2472 6848

如何前往：乘西鐵到天水圍港鐵站，或由上水乘276A巴士於聚星樓站下車；之後轉乘的士直接前往，毋須$30車費便可到達。

其他收費活動

撈　　金　　魚：$20/5個紙網

BBQ燒烤套餐：$580（8~9 位用）

　　　　　 　　　$380（4~5 位用）

釣　　　　　魚： $20/一支魚竿/１小時

　　　　　　　　（按金$20包魚竿及魚餌）

　　　　　　　　$60/一支魚竿/全日

　　　　　　　　（按金$20包魚竿及魚餌）