百萬身價BeoVision 4 3D戲院入豪門

屋企煲碟時點都冇戲院咁震撼？答案明顯是電視尺寸問題。嫌巿面的40、50吋電視畫面太細，不妨考慮B&O新出的3D電視BeoVision 4，85吋入門價$80幾萬，103吋售價更逾$130萬，雖然叫價夠畀市區樓首期，但以頂級Plasma面板用料，暗位深黑銳利之餘，光暗對比的細膩度比LED機更強，連唱作歌手謝文雅睇過都大讚好似將戲院搬返屋企。

售價：$847,700（85吋型號連座地架）＊另備103吋型號連座地架，售價為$1,328,900。BeoVision 4沒有內置喇叭，用家可另購同廠BeoLab 10三角喇叭。售價：$42,300

103吋戲院級震撼

想以過百吋屏幕欣賞3D電影，投影機本來是好選擇，但安裝及環境上有不少限制，例如煲碟時要拉窗簾、皇帝位距離等，反觀BeoVision 4就靈活得多，單係85吋型號就有成個人咁高，震撼感媲美戲院，而且亮度輸出充裕，就算日光日白唔拉窗簾，畫質都清晰亮麗。其次是選用主動式快門3D及Vision Clear優化技術，能將1,080p畫質盡情發揮，就算巨型畫面都見到圓滑的輪廓邊位。惟美中不足是新機不支援2D轉3D功能，需接駁3D藍光機才能欣賞層次分明的3D效果。

Plasma暗位分明

為了令暗位更深黑銳利，新機採用全高清Plasma面板，暗位實淨之餘，漸變細節更見分明，欣賞偏暗的3D畫面亦見清晰，配合Automatic Picture Control功能，能因應環境光暗而自動調節亮度。針對3D畫面的流暢度，機身加入600Hz插幀技術，就算顯示高速移動的打鬥或動作場面都絕冇殘影，但由於沒有內置高清電視調頻器的關係，想睇高清節目就要另駁機頂盒。