《Gears of War 3》50波 持久戰 女角開殺戒
《Gears of War 3》雖然要到9月20日才推出，但宣傳攻勢已經一浪接一浪，首先放出多人對戰Beta試玩版遊戲，早前動漫節亦加插預訂活動，幾日前連遊戲設計師Jim Brown都專登飛來香港造勢！這套年度射擊大作，除了以往血腥刺激的電鋸行刑外，今集女角Anya更衝上前線殺敵，故事模式又支援到4打，50波持久戰模式更可賺錢買裝備，機迷點可以唔玩！
撰文：布偉倫 部分攝影：梁偉德
查詢電話：3071 4868
類 型：射擊
開 發：Epic Games
平 台：Xbox 360
推出日期：9月20日
售 價：$329（普通版）
$399（限定版）
女角揸槍上陣
射擊遊戲主角向來是雄赳赳的壯男，鮮有女角可以分一杯羹。但《Gears of War 3》卻搞搞新意思，將上兩集有份出場的通訊員Anya派上戰場。點解會安排Anya拎起重型武器駁火？Jim解釋：「上兩集故事形勢未算危急，人類還有生存希望，所以Anya仍可做後勤，但到今集故事講述人類的最後城市已經淪陷，仲要面對從地底湧出來的新敵人，逼到Anya都要上前線搏殺。」香港出名的女機迷Kali都話必定會用Anya，打機時會更加投入喎！
4打故事模式
故事性、戰鬥場面加上多人模式的平衡，是《Gears of War》系列的過人之處。但不少資深機迷，一玩射擊遊戲都會飛過故事模式，直入多人模式，無形中令遊戲故事變成雞肋。不過新作就在故事模式中加入連線玩法，屬這系列嘅第一次，讓各位連上Xbox Live同另外3名玩家出生入死，感受故事模式的內容，唔使怕自閉單打咁沉悶。
Beast Mode扮怪獸
上網最吸引之處係多人互毆，新作亦大幅強化多人模式，可以玩到10人對戰，並加入既簡單又刺激的Capture the Leader、Deathmatch等玩法，而最特別係今次唔一定要扮幸存者打怪獸，仲可在Beast Mode扮成怪獸，利用自己嘅專長偷襲人類，夠晒爽！另外，上集玩家好鍾意打的「50波」Horde持久戰模式，到《Gears of War 3》則變為2.0版本，除咗每10波會出現Boss之外，仲可以透過殺敵賺錢買裝備。打打吓更會出現獎勵任務，可以賺到更多武器、彈藥同獎金，玩落好有新鮮感！