你我他都係升斗市民，等財爺派糖等到口都乾先有番啲聲氣，仲要分批付款都唔知幾時先分到畀你，又唔知可以止到剎那口腹之欲仲有乜滿足感。
與其等呢粒糖不如試試美國自動送上門嘅平靚正「糖衣包裝」，至少拆開包裝紙之後，可以幫我自製經濟效益、容光煥發咁討好自己，仲有另一種生活態度嘅滋味！Come On！無論係現實、潮流定趨勢，信不信由你，我反正信了，其實，我的生活都可以好「美」！
可能因為吹中國東風，所以香港不費吹灰之力就有大量外國浪「潮」吹埋嚟。近期由美國湧埋嚟嘅就有著名平價連鎖服飾品牌AMERICAN EAGLE OUTFITTERS（Outfitters）、GAP、Abercrombie & Fitch（A&F）、Hollister Co.（Hollister）、FOREVER 21。話之你話美牌着陸比起幾年前嘅歐牌已經係第二水Fast Fashion，但至少一水比一水好，呢一水更滲着美國精神，人人平等，令個個都着得起流行時裝！
首浪Fast Fashion係平係快，但就衍生咗抄款同劣質嘅問題。第二浪嘅Fast Fashion比以往更趨成熟，兵工廠已成為專業團隊，由Design到產品製成只係大約10天，個價錢重要係平到你覺得唔買會對唔住自己！亦都係咁先可以令我等平民百姓都可以日日靚款Day Day新Look！
由於新浪潮叫好又叫座，令大Brand「覺悟」應造福市民，所以甚麼貴牌交叉平牌聯乘作、限量作喺第二浪統統有齊，例如GAP同VALENTINO Crossover。加上歐牌跑出既嚟嚟去去只係H&M同ZARA，TOPSHOP又永遠只聞樓梯響，既然今浪有大牌之名，設計又更加有保證，真係比權相佑套戲更收得，比受惠更受惠！
Nam Kong 時裝達人
「其實呢類Mass Production無論對獨立設計師、平價品牌、大型Designer Brands，甚至全球時裝界都有影響，因為價錢太吸引、款式又夠快、Quality又唔錯，我身邊唔少OL都話幫襯呢啲多。
以前好想American Apparel入嚟香港，不過可能香港舖租太貴搞到佢地唔肯嚟，所以我覺得今次連續幾個美牌嚟幾OK，最鍾意係以前去美國一定會去嘅GAP，以後方便好多！」
Candy Wong 潮流記者
「5個品牌之中最期待FOREVER 21，因為款式多、夠Trendy、價錢平，喺美國甚至平到幾十蚊或百幾二百蚊就有交易，同埋Quality真係唔錯！」
「到港一遊」已經係內地遊客嘅嗜好，因為免稅價錢平、款式選擇多、信譽有保證。據香港旅遊發展局4月發表的報告，2010年內地遊客在港最主要消費目的是購物，其中46%受訪者表示購買服裝比化妝品及食品等其他類別更多，亦令熱「潮」推得更高！
另外，據一家房地產公司2011年最新的零售報告指出，香港是世界最大的奢侈品市場，全球已有84%奢侈品及商務時尚零售商進駐，所以產品質素一直高企，亦令唔少外國品牌認定香港市場係信心嘅保證！
美式瘋潮嚟得香港，豈會錯過鄰近嘅內地過門而不入？而佢哋亦好細心，由服裝設計、製造步驟同細節位都顧及，例如早前GAP喺上海同北京開幕時，旗下嘅1969 Premium Jeans系列就特別設計獨家牛仔褲，另剛到港嘅Hollister 服飾牌仔亦印上簡體字及人民幣標價，絕對親民！
美牌嘅平價優質「潮」水除咗可以滋潤荷包之外，仲可以沖洗全身頹氣。都市人日日着到拘拘謹謹「Look」出門，工作讀書壓力壓上加壓，美牌就話畀我哋知，其實我哋都可以由無生氣變成有朝氣咁返工，就由每日嘅衣着開始！
美牌風格標榜休閒舒適Smart Casual，恤衫、Polo Shirt、卡其褲、牛仔褲，各自發放不同正能量。Outfitters嘅校園格調，清新氣息沖淡讀書納悶氣氛，令大學生做校園萬人迷。GAP仲好啲，少少斯文又點點親民，返工見人又得，放工去玩亦得，可謂打工一族嘅提神劑。FOREVER 21嘅Casual Wear易襯易配搭，唔俗套又得體……美牌介乎返工與玩樂、高貴與糜爛之間，無非想你Enjoy Your Life！
更重要嘅係，當依家嘅人好有深度、但又未完全摸透新世代哲理甚麼「你的『衣着』如何，你的生活也必如何」之際，其實美牌嘅背後精神就可以做Reference。令人無法抗拒嘅樂活主義源自美國，淨睇A&F嘅Street Fashion無拘無束，而力撐Kidults、I.T.人、矽谷人嘅Hollister輕鬆自在，就有理由相信近排美牌比歐牌跑出「啲咁多」個身位，或多或少因為「食正」香港人最想要嘅「我HEA故我在嘅忙『Look』」，係HEA，但HEA得美妙！時裝之美，包括慢味「美」好生活嘅態度，想有好生活，先要有好睇Look，討好自己就係咁簡單。
Celia Wong 時裝達人
「我五、六年前曾經對A&F好瘋狂，會特登上網買。GAP我都好鍾意，因為個Style好啱我，多變化、Lifestyle之餘又有個性。另外，FOREVER 21嘅款式好In Trend、Accessories好靚，淨係見到都已經好開心，襯晒之後成個人感覺都會煥然一新，所以我覺得應該會成為H&M嘅勁敵！其實咁多牌子嚟香港證明香港拍得住最潮嘅東京同其他大城市！」
Jun Chan 潮流記者
「其實美國嘅Street Fashion好值得欣賞，T-shirt、牛仔褲，Casual Wear真係好舒服。另外，個人情意結比較鍾情GAP，佢係好早去日本嘅美牌，嗰陣好多人專登去日本買，掀起美式簡約、休閒、清爽嘅Style，特別係扯褲，簡單得嚟斯斯文文，但又唔會話太過Formal，仲可以着得出個人風格，恰到好處！」
雖則話無人鍾意聽到「戰亂」兩個字，但美國5個著名平價連鎖服飾品牌陸續登陸香港，各有唔同特色，呢場搶灘戰，我哋唔單止無遭殃，反而係漁人得利，有得揀，咁先會着得盞！
OUTFITTERS早於今年3月已搶先在尖沙咀開設大型專門店。品牌走美式校園同Casual Wear路線，Print Tee、衞衣同牛仔褲最耍家，開學季節仲特別推出年輕人Back To School返學便服。Tee款只係百幾至二百幾就有交易，連潮流Icon Blake Lively都愛兼要分一杯羹！
可能GAP知道香港人有鋪叮叮癮所以都嚟個翻叮熱！品牌預計將於11月翻撻，係香港開全球第三大旗艦店，更租咗中環即將落成、月租達500萬的陸海通大廈。咁有架勢係因為佢嘅設計可謂美式服裝嘅象徵，經典作如格仔恤衫、牛津紡恤衫、卡其褲等，簡約兼Trendy，點會令人唔鍾意！
有無留意中環畢打行間Shanghai Tang唔見咗？因為個靚位畀A&F要咗！仲盛傳係700萬月租！品牌咁積極只不過可能想貫徹佢嘅活力風格，美國東岸同Ivy League Style，廣告又大玩性感誘人Feel，仲專門聘用好似Model咁吸引嘅俊男美女做店員，唔信？聽講品牌最快係年尾或明年初開幕，到時睇睇咪知！
早前踏入又一城開設達一萬平方呎首間專門店嘅Hollister，屬A&F旗下或者較「後生」嘅關係，所以比較「佻脫」，充滿「SoCal」Southern California南加州的陽光滑浪同海灘風情，吊帶小背心、Logo Print Tee、牛仔褲，感覺輕輕鬆鬆懶洋洋，加上一般Tee款只係大約二百元，教後生女如何不愛他！
高處未算高，那邊廂其他美牌開設旗艦店，這邊廂FOREVER 21就以天價月租1,100萬着陸銅鑼灣，預計年尾或明年初開設6層高嘅大中華區旗艦店！品牌風頭一時無兩，實力亦不薄弱，服飾多元化，有唔同副線各自各精彩，LOVE 21行斯文OL路，仲有21MEN男裝同FOREVER21 girls童裝，簡直係成家搬晒過嚟！
撰文、部分攝影：朱寶茵