戲院感爆燈！XT39偏光3D冇眼花

市場上的3D TV，大多採用主動式快門技術，要透過3D眼鏡上的快門開關，令左右眼接收到3D影像，但若畫面或片源處理得唔好，閃動時便可能睇到眼花。因此Hisense在最新XT39系列3D TV，破格選用被動式偏光技術，用番戲院的3D眼鏡就睇到立體影像，有效減少畫面閃爍之餘，更支援2D轉3D及網絡功能，32吋入門型號只售$5,580，抵玩！

售價：$5,580（32吋）、$7,990（40吋）、$13,990（46吋）

減閃動更穩定

3D TV界有三大陣營，分別是裸眼、主動式快門及被動式偏光，裸眼技術尚未成熟，造價昂貴，能否打入屋仍屬未知之數；而主動式快門雖然畫質較靚，但缺點是眼鏡快門高速開關，容易令畫面閃動，如家居環境是以光管來照明，情況便會更惡劣。故XT39系列選用被動式偏光技術，可用回戲院的3D眼鏡，不但輕巧、經濟得多，配合120Hz插幀技術更能減少畫面閃動，就算顯示動態畫面都流暢自然。

3D眼鏡免入電

由於被動式偏光3D眼鏡省掉了快門裝置，重量輕巧得多，長時間戴着都唔覺重，其次是毋須入電，唔怕睇睇吓戲要臨時臨急充電咁冇癮，最重要是售價經濟得多，去戲院買副鏡都係$6，比售價近千元的主動式快門3D眼鏡平一大截，就算屋企人多，都可以一人一副齊齊煲碟。

遙控器右下角設有3D掣，一按可將電視、DVD等視訊變為3D。

Edge LED背光技術能縮減機身厚度。

超薄機身暗位分明

大家可能會問「為何3D TV的主流還是主動式快門技術呢？」主因是它可用盡1,080p畫質，而被動式偏光技術因要分隔左右眼畫面，只能做到540p。為了彌補這點，XT39採用LED晶彩影像處理引擎，能擴展色域範圍及優化輪廓邊緣，令畫質更圓滑細膩；同時針對隔住3D眼鏡會令畫面變暗的缺點，引入Edge LED背光技術提升暗位層次感，將動態對比度提升至500,000:1，令暗位細節清晰分明。