球迷．講波．啦啦隊 美女足球熱
暑假餓波太耐，連女子足球世界盃都睇埋，原以為只用來打發時間的球賽，點知愈看愈有味道，塗指甲跟眼影上陣的法國女足14號妮絲比驚艷全球。當然要在球場中找到美女往往比搵靚仔更難，但近年足球跟美女其實都可以拉上關係。跟網民用「獌」、「猁」等揶揄敵對球迷不同，車仔粉絲吳若希、講波主持Wendy跟o靚模啦啦隊LuLu既有自己支持愛隊的一套，亦打破了足球無美女的定律。
心繫王子托利斯
上月底車路士訪港，兩場比賽翌日的體育版報道，都發現同一標致女球迷的大大幅照片。她是新進女歌手吳若希，最能令人留下印象是42吋長腿。以為佢博出風頭，其實她真是車路士香港球迷會成員，對傑志及阿士東維拉兩場比賽都同球迷會成員一同打氣。「上屆世界盃睇波期間認識了車路士球迷會朋友，經潛移默化就成為了車仔Fans。」靚仔球員是原因嗎？吳若希說：「絕對關事！」王子托利斯是她的至愛，身上所穿的球衣更有托利斯簽名；黑實的杜奧巴亦是她的心水，「那次睇佢哋練波我同杜奧巴Say Hi，佢好Nice呀！」
望倫敦現場睇波
吳若希今次入大球場捧車路士感覺超High，「我哋帶晒BiBi（打氣哨子）同BuBu（打氣喇叭）入場，成場一齊唱會歌，We love you Chelsea, We Do, We love you Chelsea, We Do.」經過這次現場追捧心愛球隊的經歷，更激起她到倫敦史丹福橋車路士主場睇波的決心，「希望明年可以成行，最好可以見證Chelsea拎英超冠軍的場面！」車路士之外，吳若希原來亦喜歡巴塞，韋拿更是她的「飛佛」。又車仔又巴塞有牴觸嗎？「冇！西甲捧巴塞，英超就捧車路士！」
自告奮勇學講波
足球評述員通常被稱為「講波佬」，但點解講波的一定要係佬，靚女又可唔可以講波？Wendy（謝蕙妍）可說是本地第一代女足球評述員。「最初做球彩台並冇人叫我講波，但冇理由淨係男拍檔講晒，女仔就乜都講唔到，我哋Presentation能力應該好啲o架！」參與Euro Babe到加入球彩台已是7年前的事情，Wendy表示最初有點似明明唔鍾意讀Econ而被迫修讀Econ一樣，由白紙一張到開竅差不多用上兩年時間。「我真係唔及阿鵬同其他男拍檔，連70、80年代球員都識晒，惟有將勤補拙，日日上網惡補足球知識。」
貼曼聯再奪英超
最初講波難免會惹來挑剔，但現時已講得有紋有路。參與足球節目7年，Wendy睇波已有要求，最怕是遇到悶波：「有些球賽真係好悶，又或者兩隊都踢得好差，好在同事們都好識搞氣氛，令到大家睇波唔會瞌眼瞓。」睇過Wendy做節目都會知道她是曼聯Fans，如果直播途中曼聯踢得差，會不會好失望？「我想做一個有理性分析能力的主持，唔會畀太多私人感情影響。」曼聯仍是Wendy今季英超冠軍心水，車路士次之，阿仙奴、利物浦跟曼城就互爭三、四、五位，「今季歐聯決賽希望會由曼聯對皇馬，摩連奴當年教國米都係第二年先捧盃，今年皇馬應該有料到。」
帶起啦啦隊熱潮
「我唔係好識足球。」說出這句話的是去年見報率比港甲球員還要高的大埔足球天使LuLu（董嘉儀），或簡稱為大埔LuLu。「其實世界盃時，有朋友叫我睇波，我都冇去睇，不過當上年港甲新球季開鑼時，接受大埔足球會贊助商邀請出任啦啦隊，先至開始接觸足球。」LuLu可說是帶起本地球會美少女啦啦隊的潮流，但身材嬌小的她，圍在一班練波練到身水身汗，甚至赤膊上陣的大男人中間，會否覺得尷尬呢？「反而係球員更怕醜，唔敢同我傾偈，惟有靠facebook、SMS、MSN同球員傾偈打打氣！」
今年新招跳舞打氣
自言唔太識波，今季首要學識睇球隊戰術的LuLu，諗橋打氣確有一手。「原本上年已構思在中場時間跳舞，為大埔足球隊打氣，但最初得我和之後加入的Szeji，人手太少難以成事。但今年大埔足球天使加多3位新成員，大家在之前的影會工作已經認識，中場跳舞打氣這一招應該可成事。」這一年，LuLu對足球都有不少得着，包括接觸到熱情的大埔球迷，而且開始於facebook群組跟球迷們傾波經。不過相信很多人都想問：「大埔LuLu是否住大埔呢？」她笑住回答：「哈哈哈，我住天水圍呢！」
靚仔球衣最冧女
一般球衣專門店都少有女裝球衣，但不代表沒有女仔買波衫。據旺角球衣專門店352大本營老闆Roy所講，一向都有女士買球衣，通常會買男裝細碼或男裝中碼配Leggings。至於今季最受女士歡迎的球衣，都離不開曼聯、車路士、利物浦、阿仙奴同皇馬。點解冇巴塞份？「巴塞少靚仔囉！」
hd200台專播英超
由於歷史問題同直播時間關係，香港人最愛的始終是英超，但過往都冇一個專屬高清英超台。但由今季開始，隨住上周六英超開鑼，有線開設新台hd200，直播英超球賽及英超相關節目如《足球達人》、《足球前瞻》及《英超Plus》等。
日本女足美人Blog
女生加足球，好直接就聯想到剛勇奪女子世界盃冠軍的日本女子國家隊。雖然日本隊隊長澤穗希同時集金球獎和金靴獎於一身，但賽後最先彈出反而係被稱為隊中第一美女的丸山桂里奈（Maruyama Karina），賽後更傳出艷照門事件。
港甲足球 寶貝跟風
大埔足球隊可說帶起了港甲美少女啦啦隊的潮流，但今年的美少女打氣團已非大埔專利，兩支本地港甲球隊公民及屯門都加入美少女打氣團，為球隊作宣傳。最重要是引起大家話題，令公眾更留意港足發展，亦不失為一件好事。
撰文：布偉倫
攝影：蘇榮基、胡淑儀（部分相片由受訪者提供）
場地提供：車路士足球訓練學校
查詢電話 （產品）：（a）2388 8382、（b）2770 7352