香港滿布高樓大廈，而且由街燈、樓宇所造成的光污染嚴重，就算抬頭望向夜空，亦難以觀賞星星，搞到一班天文愛好者要遠赴大嶼山甚至內地進行觀星活動。好在App Store備有大量天文Apps，由專業知識、星象圖片到小遊戲全部有齊，以下便推介5個人氣App，以後同女友攤喺床都可以數星星，夠晒浪漫！
撰文：林子聰
除了火星、木星各大行星外，太陽系中心「太陽」亦是天文學家經常研究的對象，但想飛近少少都唔容易，幸好《3D Sun》能展示大量太陽立體圖片，這些圖片由美國太空總署的「STEREO」衞星拍攝，資料快而準。大家更可以Zoom近太陽表面，追蹤黑子活動呢！
售價：免費
望着茫茫星空，想了解各星體特點確是一件不容易的事，《Starmap Pro》內置超過2,500,000個星體，當中有超過8,300個備有詳細資料，再加上470,000個恒星資料，隨時詳細過百科全書。最重要係這App可配合天文望遠鏡等專業儀器使用，難怪賣成$18.99美元都咁受歡迎。
售價：$18.99美元（折約HK$148.1）
阿波羅11號當年載着Neil Armstrong等太空人登月，踏出人類的第一步。各位如想體驗太空人的感覺，就一定要試《Apollo 11: The Game》，App內模擬駕駛阿波羅11號的情景，要成功駕駛太空船升降，最關鍵是角度及燃料控制，上完太空仲可以坐太空艙落番地球，夠晒過癮。
售價：$1.99美元（折約HK$15.5）
一睇《NASA App》個名，就知是由美國太空總署推出的官方App。它除了定期更新太空任務消息和圖片外，更提供短片、NASA TV等較少見的資料，咁就可以邊搭車邊睇太空短片。為求緊貼潮流，最近更加入twitter專頁，齊集所有關於NASA的Tweets，非常方便。
售價：免費
滿天星海雖然靚，但想用相機拍低，就必須使用專業攝影器材。《Star Walk》便將大部分星星資料以及圖片收錄，讓大家可以不同角度、距離觀賞星體，猶如飛出外太空一樣。最特別是支援中文介面及Time Machine功能，能以中文列出過去、未來的星星狀a態，以後唔怕錯過觀星的最佳時機！
售價：$2.99美元（折約HK$23.3）