糖妹挑機 Resistance 3首襲電腦節

電腦節快將於下星期展開，今年不但有筍價電腦產品，原來仲有機打！PlayStation將會首度於香港電腦節擺下擂台讓各位挑機，除了備有PSN遊戲試玩及優惠之外，更會展出兩套未出的PS3大作，當中《Resistance 3》更係首度曝光，女神糖妹、吳若希、李蘊更會在場挑機，逼爆都要去啦！

3D對應PS Move

據知，兩套未推出的遊戲包括《Street Fighter × Tekken》同《Resistance 3》，前者早前經已在香港試玩會報道過，反而預定今年9月6日推出的射擊大作《Resistance 3》屬首度曝光。玩過前兩集《Resistance》的玩家，應該記得係講述拎住二戰武器的人類，要對抗變種入侵者Chimera，結果被打到走夾唔抖；而今集故事背景設定於4年後，幸存的主角要在美國邊走佬邊打異形，更首度對應3D顯示，以及用PS Move狙擊槍配件體感打怪物，玩落勁有新鮮感。

武器升級打得爽

玩家除了可選用Bullseye等經典重火力武器外，新一集更加入武器升級系統，讓各位殺得痛快。不過大家亦會發現入侵者Chimera變得更聰明和敏捷，就算點樣匿埋都冇用，都係揸槍駁火最實際，而且頭目設計更誇張，攻擊力特強，非常難打。雖然現場試玩版關數有限，兼且冇多人模式可揀，但遊戲卻可對應PlayStation即將推出的3D顯示屏，既可享受怪物立體撲埋身的刺激感，亦能做到雙打時兩名玩家各自睇到唔同畫面的聰明設計，展會期間仲有3位女神上台挑機，值得期待。