智串Vulkano手機變電視

電視可說是消閒良伴，但出街等人搭車，冇理由托住部電視出街吧？幻音數碼推出的3BAYS Vulkano便針對流動人士而設計，只要將它接駁屋企的機頂盒或天線，便可把1,080i高清電視節目，經3G或Wi-Fi串流至手機或Tablet上欣賞，仲可以做埋遙距錄影，以後實唔怕錯過心水節目。

售價：$1,980（不連手機）

高清隨街串流

唔少國產手機都備有流動電視功能，不過很多人試過都睇到發脾氣，皆因天線訊號唔穩定之餘，畫面仲起晒格。Vulkano就透過串流技術，將數碼電視經網絡傳送到支援3G或Wi-Fi的流動裝置播放，而且質素有720p或1,080i高清咁靚，小記即場用iPad試睇，畫面絕無狗牙，真係可以隨街「串」住睇！

多平台更抵玩

由於Vulkano只能作一對一串流，唔能夠多台廣播，所以就算你有部Android手機，又有部iPad，都唔可以一齊開。幸好用家可以同一帳戶在不同平台登入收看，支援iOS、Android、Windows、Mac等平台，其中用作串流播放的《Vulkano Player》App更屬免費。即是你只需以$1,980一個價錢，便能在不同平台收看串流節目，不用擔心需要額外買App。對於「周身機、張張利」的人，算係幾抵玩。

扁長的Vulkano，網紋外殼設計時尚。

機側配有USB及SD卡插槽作儲存。

預錄心水節目

用手機或平板電腦隨時睇電視當然好，但電視做乜節目就唔到你控制，萬一開OT錯過心水劇集點算好？新機便加入遙控預錄功能，讓用家透過《Vulkano Player》App遙距輸入頻道、錄影時間等資料，家裏部Vulkano便會定時進行錄影，並儲存到SD卡或外置硬碟內。這方法最正係可將錄影的節目，透過網絡送去你部流動裝置，讓你忙完搭車返屋企時便可以立即收看。