街霸×鐵拳2012入屋挑機

操控傾向《街霸》

玩過《街霸》同《鐵拳》的話，都知道兩款遊戲操作方式頗為不同，前者用6個掣操作，而後者得4個。不過話晒係由Capcom《街霸4》團隊開發，所以新作除用上水墨畫風格外，《鐵拳》角色的操作按鈕亦會將原來左拳、右拳、左腳、右腳，變為輕、中拳腳，而剩低的重拳、重腳掣，就留番來出連續技，唔算難上手。

Tag Mode似《鐵拳》

今次的Demo金碟只有14個角色，《街霸》方面有Ryu、Ken、Sagat、Cammy等，而《鐵拳》陣營就有三島一八、Julia同Hwoarang等。不過《街霸》通常係Chok招出波、出昇，而《鐵拳》就實牙實齒以按鍵組合出招數，都要花時間去適應。最特別是新作可以雙人Tag Mode接力對打，讓玩家因應戰術需要或者角色血量而換人，如能夠夾啱Timing，更可同隊友合作發動連續技。但小記試玩時發現，換人有短暫「硬直」時間，容易被敵人乘機抽水；而且隊伍中只要有一個角色死亡即刻當輸，這方面就較似《鐵拳》。

簡化連續技出招

雙人合作模式還加入不少新玩法，如同時按重拳、重腳，打中對手就會令對方飛起，然後自動會換人在空中使出連續技或必殺技。另外在危急關頭按中拳、中腳叫隊友幫手，可以免除「硬直」狀態換人，但要消費一格能源，抵唔抵就見仁見智啦。為咗平衡兩班格鬥迷的操控，新作更加入共通連續技設定，只要連打輕、中、重、重拳或腳就可使出角色連續技，唔使打打下唔記得點Chok咁閉翳。但整體感覺是《鐵拳》玩家要遷就的比較多，或者正式版推出時會再作微調，值得期待。

類型：格鬥

開發：Capcom

平台：PS3、PS Vita、Xbox 360

推出日期：2012年初

售價：待定

撰文、部分攝影：布偉倫