天口熱，工作難免心浮氣躁，撞正卸膊同事或難頂上司，絕對係火上加油。唔想壓力大又怕腸胃壞，同人哋吵大鑊，一於搵iPhone幫自己發洩兼減壓。近年App Store有不少出氣工具，拳打腳踢、打小人樣樣有齊，可以隨時教訓「眼中釘」一餐！
釘書機、擦膠、紙張是辦公室必備的文具，平時就用得多，有冇諗過把文具當武器呢？《Office Jerk》內，用家可肆意拿起文具，掟向對面位的老闆；而老闆更會「嘴藐藐」，令投入感大增。最正係除了一般文具外，另有忌廉蛋糕和炸藥等，兜頭掟佢最過癮！
售價：免費
拳打腳踢無疑是最直接的發洩方法，《Boxing Fighter》就可以畀大家過吓打拳癮。用家搖身一變成為職業拳手，與不同角色對打。遊戲更設有Career模式，讓各位自創人物，兼且透過贏比賽儲分數，為角色購買新招式及裝備，十分耐玩。
售價：0.99美元（折約港幣$7.8）
相信大家小時候一定玩過扑傻瓜，手持大錘向田鼠怒扑，何其爽快！現在iPhone都有得玩。在《DoogiPang》中，玩家要用錘仔打扁隨機彈出來的「傻瓜」，扑中次數愈多，分數自然愈高。加上「傻瓜」以熊仔、兔仔等公仔作招徠，畫面更加吸引。
售價：免費
遇着無理取鬧的老闆，谷住一肚氣無從發洩，就一定要試玩《Punch Boss》。睇個名就知遊戲是以打老闆為主，玩家可以用兜巴星或者昇龍拳兩招KO老闆，打到佢口腫面腫！有趣的是打之前會出埋Memo，絕對唔使留手。
售價：
0.99美元（折約港幣$7.8）
「打你個小人頭，打到你有氣冇碇抖！」現在打小人唔使到鵝頸橋，隨時拎部iPhone一樣打到。這App參照傳統打小人習俗，以黃紙寫上小人的名字，就可以肆意用拖鞋打佢。還可加入對方的真實相片，打得更投入。
售價：0.99美元 （折約港幣$7.8）
撰文：林子聰