一放假就躲在家中打機睇戲，感覺當然有點宅。但如果你想出街逛逛，又不想放棄打機睇戲這嗜好，帶住部iPhone或iPad就搞掂，皆因愈來愈多新戲踩過界，推出跟足電影風格的遊戲App，以後邊打機邊睇劇情，隨時打又可隨時停，記住要「單撈」定幾隻出街啦！
如果聽到「你鍾意睇邊套恐怖片？」這句經典對白，相信很快就想到《奪命狂呼》電影的鬼面殺手。今次在《Scream 4》遊戲一反傳統，讓玩家扮演神出鬼沒的鬼面殺手，追殺目標的同時還要避開警察和其他人發現。惟要留意這個App要17歲以上人士才可下載。
看到這個機械人畫上兔仔圖案的造型，各位會否想起《天姬戰》電影呢？戲內5位美女身處槍林彈雨，畫面震撼。而電影公司推出這隻iPad App，玩家雖無緣扮演美女闖關，但駕駛着搶眼的兔仔臉機械人，配合3D遊戲畫面和澎湃音效，一樣咁刺激，可惜只能用美國帳戶下載。
別以為是Official Game就覺得好玩極有限，這App改編自《狂野時速5》電影，Menu能隱約見到主角Brian O'Conner在車中。除了單機故事章節外，還提供普通賽、淘汰賽、計時賽等不同模式，更支援線上對戰，能與10名玩家鍊過，配合暢快音樂於街道風馳電掣。
Doodle Jump人氣大熱，今次聯同早前上映的電影《復活反斗王》推出特別版遊戲。原本的主角Doodler變成《復活反斗王》兔仔E.B.，而每關的目標就是拿到最高處的彩蛋。關卡設計亦因應電影作出改動，例如中途會出現一跳就消失的雲朵和糖果假跳台等。
撰文：李潤康