Janice Man飛越迷城
黎明（Leon）廣告有句金句：「要贏人先要贏自己！」這正正也成為了他親手羅致旗下的文詠珊（Janice Man）的座右銘。由寂寂無聞的o靚模，搖身一變成為潮模兼藝人，JM坦言要成功就得要保留自我，維持風格，不應盲目順應別人，迷失自我，潮流亦然。
五年前Janice Man與Angelababy一同彈出，兩人被冠以o靚模稱號，不久之後，城中o靚模爭相湧現，JM和Baby升呢到神枱，JM說：「每一個年代都會誕生唔同嘅人，傳媒太誇獎我哋，可能以前冇咁多young嘅model，同埋以前嘅model普遍都好高，同依家嘅model有好大分別，不過呢個始終係我一段好好嘅經歷！」
JＭ表示初入行時，每天都感到很新鮮，就連放假外出都不放過扮靚的機會，反而近年知名度增加，人卻變得低調：「以前唔使開工出街都扮到好『行』，着晒高跟鞋set晒頭，好想表達自己，但依家唔使做嘢就一定唔化妝，盡量低調，或者係信心嘅表現。」
跟樂基兒學嘢
同是model出身的樂基兒（Gaile），既是老闆娘也是良友，二人經常交換穿衣心得，Janice Man早前出席Puma Social派對時接受訪問，大談二人扮靚逸事，她笑說：「如果我哋出埠，就一定會一齊shopping，通常我哋會分開行，然後約喺櫃枱等，跟住大家就會各自攞自己嘅戰利品出嚟，互相畀意見，Gaile會話畀我聽邊件OK邊件唔好，又會提議我可以點樣襯，自己都學到嘢！」
JM認為作為藝人，有機會穿着最新的衣飾，其實已是一個icon，她續說：「自己都仲係22歲，仲有好多嘢要吸收，平時盡量睇多啲時裝雜誌，消化之後再加少少自己嘅配搭，就可以有一個型格但屬於自己嘅style，最忌係照抄，因為有時貴嘅衫未必一定啱自己，平啲嘅亦唔代表一定唔好，最緊要識得隱惡揚善！」
甩拖純屬煙幕
剛入行已宣布名花有主，JM坦言沒有後悔，她說：「呢個係我嘅性格，我覺得人唔可以迷失，同埋以前自己係model身份，自由度大啲，亦冇咁多避忌，其實我只係做番我年齡嘅事，20歲頭嘅女仔，可能仲係好開心讀緊書，無憂無慮，但我選擇咗出嚟搵錢養家，就要接受。」
早前有指JM情海翻波，原來屬煙幕一場，她解釋說：「我唔講只係想保護身邊人，因為我愈講對佢影響就愈大，佢都開始畀人追訪，我覺得對佢好唔公平，而且呢個始終係自己嘅私生活；我唔後悔公開，唔代表我要繼續講，可能人大咗心態唔同咗！」
JM說她很感激男友李冠鋒的支持，令她能放心在娛樂圈走下去：「我諗一個正常人都唔係咁接受另一半係做娛樂圈，但佢好成熟，好好人；有時有啲公司會擔心藝人拍拖影響工作，但愛情對我反而有正面嘅幫助，令我更有原動力！」JM謂小時候會將愛情放得很大，但人大了明白人生有很多不同的事要面對，現正努力發展事業的她，此刻愛情就成了她的力量劑，令人生變得更美滿！
闖影圈展拳腳
近年Janice Man轉戰影壇，在電影方面大展拳腳；最新代表就是和黃秋生及任賢齊等人合演的《報應》，戲中她飾演極度反叛的吸毒少女，她認為發展空間相當大，她說：「啱啱接到劇本時好開心，因為覺得個角色係一個好大嘅挑戰，亦有好多發展空間，所以自己好期待！」她認為做model只要將衣服穿得好看就完成了自己的部分，但拍戲就要講求內心發揮及團體精神，這亦是她開始愛上演戲的原因！
性本善心態變
JM說她是一個容易受傷的女人，入行後因自我保護才看似硬朗，別人都說娛樂圈是一個複雜的大染缸，她卻不同意：「啲人成日覺得呢行啲人好複雜，其實人人都係為咗保護自己先會咁，我相信人本性係善良，變嘅只係心態，而唔係性格，不過呢一行好少會聽到『善良』呢兩個字，人哋只會話你蠢，所以你就要變得外間認為嘅聰明同圓滑！」22歲的女孩子說出這一番話，雖然有點格格不入，但不就正正一語道破了娛樂圈的現象嗎？
後記：黎明令她開竅
訪問完畢，Janice Man笑說今天比平日談了很多，她說她入娛樂圈最不享受也是最怕的事，就是和記者做訪問，不過Leon一番話，令她開竅：「佢，表達自己想表達嘅，只要堅持be myself，就會搵到自己嘅方向！」金句王黎明，原來並不是我們想像中難懂，起碼，他點醒了Janice Man！
採訪：Ada Lam
攝影：劉智源