秋風送爽 釣魚心花放
近排天氣終於涼番啲，日頭溫度都徘徊喺廿零度，鍾意釣魚嘅朋友一定最Happy，起碼唔使熱餐懵先啦！如果嫌公眾碼頭太多人，自己又有部車的話，不妨載埋屋企人去海邊釣魚，順便吸吓新鮮空氣、培養吓感情，何樂而不為？不過，並唔係到處都可以進行釣魚活動，咪以為去到邊就可以釣到邊，隨時會被罰錢架！
大尾箱放裝備
釣魚用具種類繁多，要帶齊魚竿、氧氣泵、吹氣魚缸等用具嘅話，尾箱容積絕不能小。Wish 1.8以七座位布局，除了載客量較2.0版多一位外，中、後排座椅更可完全放平，以騰出平整地台，莫說吹氣魚缸，連滑水板都放得落！動力方面，Wish 1.8配上一副1.8公升直四引擎，最大的馬力、扭力分別為144匹及17.9kgm，配合七前速CVT波箱，加速順暢而線性，不僅帶來舒適的乘坐感，也造就了16.7km/L的超低油耗。
Wish路面通過性高
揸車去街固然方便，但搵位泊車往往令人最頭痛，尤其去啲偏遠嘅地方，搵停車場可以話難過登天，好大機會泊爛地，所以盡可能都唔好揸太過低嘅車，剷爛個頭唇就無謂啦！雖然是次測試的豐田（Toyota）Wish 1.8，不是為越野而設計，離地距也沒有SUV那麼高，但路面通過性卻相當不錯，於泥濘、碎石路行駛絕不成問題，但為己為人，切勿胡亂泊車，既影響交通，仲分分鐘食「牛肉乾」添！
水塘釣魚要攞牌
香港有樣嘢好，就係三面環海兼水塘多，魚類甚多，無論係鹹水魚或淡水魚，都大把地方畀你去釣。雖然，在本港大部分地方進行釣魚活動是容許的，但在特別的生態水域，如海岸公園及魚類養殖區等都會受到管制，出發前最好Check清楚，以免惹上官非。此外，去水塘釣魚都要向水務署申請牌照，只可以用魚竿或魚絲垂釣，而且有季節性限制，無牌喺水塘釣魚係違法行為，不要以身試法！
釣魚小貼士
如何申請釣魚牌照？
在本港水塘釣魚，必須向水務署申請牌照，全年均接受13歲或以上的市民申請，牌照有效期為3年，費用只需$24。此外，任何人也不得使用爆炸性或有毒物品捕殺魚類，而且只可在指定水塘及季節進行釣魚活動，詳情可致電2829 4799查詢。
釣魚都要擇日？
一般來說，潮水漲退產生的水流，會為魚兒帶來食物，海水流量及上漲水位愈高，潮漲區便會湧進更多的食物，吸引魚兒到訪。因此，在大潮的日子（農曆每月初一、二、十四、十五、十六、十七、廿九及三十）釣魚，便較易釣到魚。
規格表
車型：五門七座位MPV
引擎：直四
容積：1,798c.c.
最大馬力：144ps/6,400rpm
最大扭力：17.9kgm/4,400rpm
傳動：七前速CVT
驅動：前置引擎、前輪驅動
懸掛： （前）麥花臣式、（後）扭桿式
撰文：鄭浩文
攝影：黎劍華
模特兒：Kitty（Inspire）、Max（Fame）
鳴謝：皇冠汽車（2866 1020）