Android 2.2頭炮 Ella愛平霸IDEOS

因為一次《超級巨聲》，令官恩娜（Ella）再有機會出碟，她自言「All way standby」等機會。同樣道理亦可應用到代工廠商華為身上，多年來替別家品牌生產手機及網絡產品，在累積夠技術後，日前終於推出首部自家手機IDEOS，不但率先搭載Android 2.2系統，仲可以玩到Wi-Fi Sharing及App2SD等功能，咁都只係賣$1,880，平到連Ella都話要即刻換機！

機面除Home、目錄、搜尋等熱感鍵外，還保留了接聽及收線兩顆按鍵。

化身3G路由器

既然係全球首部原生Android 2.2智能手機，新系統自然係IDEOS嘅賣點，當中最巴閉係提供Wi-Fi Sharing功能，簡單咁講就係將手機變成3G路由器，將頻寬分享予5部數碼產品使用，以後一個上網月費就可供Notebook、PSP等同時上網，非常實用。另外，用戶亦可把手機經USB連接電腦，索性將它當作Modem使用，真係連固網寬頻都慳番。當然咁用法手機嘅電量會好快冇晒，建議買多枚後備電隨身帶住。

四色底蓋夠新鮮

華為過往研發過唔少Android手機，PCCW Mobile兩部U Android就正正由佢哋代工，眼見市場成熟，與其替他人作嫁衣裳，倒不如分一杯羹，而今回IDEOS便是旗下首部Smartphone。針對入門市場，IDEOS只配備了2.8吋QVGA芒，但核心部分則採用Qualcomm 528MHz處理器搭512MB ROM，規格好過唔少入門機；而且其機身符合人體工學設計，並備有黑、粉紅、藍、黃4色底蓋選擇，方便用戶換色保持新鮮感。

售價︰$1,880

IDEOS賣點之一係夠的骰，機身只係大過八達通少少。

程式直抄SD卡

Android Market程式數量已經突破10萬個，但舊系統只能夾硬抄落手機度用，好易逼爆內置記憶體。IDEOS搭載Android 2.2後就冇呢個問題，事關佢追加咗App2SD功能，只要程式允許，用戶就可把它們搬到microSD記憶卡上運作，從而騰出更多系統資源。特別一提的是，新系統終於支援自動更新，只要安裝程式後點取該選項，以後有新版本就識自動Update，唔似呢家隔幾天就有大量更新通知咁煩！